Shillong, Naiwieng, 06: Ka Shillong Civil Hospital ka la iohlum T.6,29,18,877 klur hapoh lai snem na ki nongpang kiba wad jingsumar ha kane ka jaka ai jingsumar. Ia kane la pyntip da u nongwad RTI u Bah Disparsing Rani katkum ka jubab RTI ba la ioh na ka Civil Hospital.
Ha ka jingiakren bad ki lad pathai khubor ha ka lah sngi U Blei u Bah Disparsing Rani u la iathuh ba kane ka jingioh lum pisa jong ka Shillong Civil Hospital ka long na ka CT Scan, MRI, Blood Test, UG Scan bad X-Ray.
U la iathuh ba ka jubab RTI ka pynpaw ba ha ki 3 snem, ka Hospital ka la ioh lum T. 2.42 klur na ka jingpyndonkam ki paidbah ia ka CT Scan, T. 26 lak na ka MRI, na ka X-Ray T.4 lak, Blood Test T.2.55 klur bad T. 57 lak na ka UG Scan.
“Kane ka jingwad RTI ka dei ban pyntip paidbah ha kaba iadei bad ka jingioh lum ka Shillong Civil Hospital namarba tang ha ki lai snem, kala ioh lum T. 6,29,18,877 klur bad ki paidbah ki donhok ban ioh ki lad jingsumar kiba bha,” ong u Bah Disparsing.
U la iathuh ba ka don kawei ka kor MRI Scan kaba shongdor T. 4.90 klur kaba la pyntreikam naduh 2013 hynrei mynta ka la sniew bad kam treikam shuh.
Shuh shuh u Bah Disparsing u la iathuh ruh ba katkum ka jubab RTI ba la ioh pdiang na ka ophis jong ka Directorate of Health Services (MI) la pynpaw ba ki don ki Doctor, Staff Nurse bad ki nongtrei 4 Grade hapoh ka Civil Hospital Shillong ki bym ioh tulop naduh ka por ba ki trei haba ka jylla Meghalaya ka la shah lynshop ha ka jingpang khlam COVID-19.
“Hadien ba ka Sorkar ka pynpaw ba ka ioh pdiang tang 76 klur na Delhi. Hynrei ha ka jubab RTI ka pynpaw ba ka la ioh pisa T. 119 klur bad ka pisa kaba dang don bad ka Sorkar ka long sa T. 43 klur. Balei ka Sorkar kam siew noh ia ka tulop jong kine ki nongtrei. Haba ki trei ia ka kam, ka Sorkar ruh ka dei ban sngewthuh lem ia ka jingdonkam jong ki,” u la ong.
Ha kaba iadei bad ka jingshna ia ka surok saw laiñ Shillong-Dawki, u Bah Disparsing Rani u la iathuh ba katkum ka jubab RTI ba la ioh na ka Ministry of Raods Transport and Highways ka Sorkar India, la pynpaw ba ia kane ka projek la aiti sha ka M/s PCC Go Tech Pvt Ltd ban shna pynheh ia ka surok na Umshyrpi haduh Umdiengpung, 7 Mer Upper Shillong. Ka kam ka la iaid katkum ka jingaipor haduh 2 snem ban pyndep ia ka Phase-I. Mynta ka pakage-2, Pakage-3, bad 5 ruh ka dang iaid. Ka don ruh ka projek ba dang pynkhreh ia ka Detailed Project Report (DPR) na ka bynta ka Shillong Eastern Bypass ban shna ia ka surok na Mawlyngkhung, Mawryngkneng, Jowai, Ratacherra kaba jrong 138 kilomiar. Kane ka dang iaid bad ka projek ban shna ia ka surok Mawthir-Kyrshai ruh ka dang iaid shakhmat.”
“Nga kyntu ia ki paidbah, ia ki Dorbar Shnong bad ia ki Sengbhalang ba ngin buh lang ia ka thong ba yn dup lah ban pyndep kloi ia kine ki projek bad ym pynthud ia ki kompeni namar ba ka don ka jingkynnoh ba ka don ka jingpynwit bad kata ka pynlehraiñ. Ki nongtrei jong ki kompeni ki wan sah tang shipor bad ki leit phai noh,” u la ong.
“Ngi ruh ngin buh nuksa ia kiwei ki jylla kum ka Mizoram bad Manipur ba ngim dei ban pynthud khnang ba ka jingangnud jong u paidbah kan long kaba biang,” u la ong.
