Shillong, Naiwieng, 13:Ka kynhun jong ki nongtrei ASHA ka West Khasi Hills ASHA Association kiba don hapoh ka shatri jong ka Meghalaya ASHA Worker Union ha ka Lah Sngi u Blei ki la mih paidbah ha sor Nongstoiñ ban pynlong ïa ka rally kaba jaijai kum ka dak ban pynpaw ïa ka jingbym hun halor ka jubab jong ka Myntri ka Koit ka Khiah ka Kong Ampareen Lyngdoh halor ki mat jingdawa jong ki ASHA.
La sdang ia ka jingiaid rally na MCH Hospital Nongstoiñ ter ter sha ïew Nongstoiñ ha kaba da ki spah ngut ki ASHA na kylleng ki shnong jong ka West Khasi Hills kynthup lang ki Garo ki la iashim bynta ha ka rally ba la pynkut ha Market Complex New Nongstoiñ da kaba bteng pat sa ka jingialang paidbah.
Ka President jong ka Meghalaya ASHA Worker Union ka kong Mirajune Myrsing haba kren ha kane ka jingialang ka la ther tyngeh ia ka ka Myntri ka koit ka khiah da kaba ong ba kum ki ASHA ki sngewkthang ban iohsngew bad sngew lyngngoh ruh ia ka jingkren jong ka Myntri ka Koit ka Khiah kaba ong ba ki ASHA ki lah ban trei tang 2 snem katba ka National Health Mission ka ong ba lada ki ASHA kiba lah ban trei haduh 10 snem kin sa ioh ia ka Golden Hand Shake kaba 20 hajar tyngka ynda ki la shong thait.Ha kane ka jingialang ki ASHA ki la dawa ia ka sorkar bad ia ka Myntri ka tnat ka Koit ka Khiah ba kan sngap ia ki jingdawa jong ki hynrei lym kumta ka jingïakhih kaba khlem pud sngi kan dang iai bteng nangne shakhmat tad haduh ban da pynbna da kumwei pat.
