Shillong, Naiwieng 22: Ka Khasi Student’s Union (KSU) ka la pynpaw ba ka pdiang ia ka jingshim rai ka Sorkar Assam bad ka Sorkar Meghalaya ban aiti ia ka jingtohkit sha ka Central Bureau of Investigation (CBI) halor ka jingshah siat iap ki san ngut ki Khasi-Pnar ha ka shnong Mukroh ha ka 22 tarik, Naiwieng, 2022 kaba la dap shisnem pura mynta ka sngi Balang.
Ka Sorkar Assam bad ka Sorkar Meghalaya ha ka 30 tarik u Nailur, 2023 ki la rai ban aiti ia ka jingtohkit ia ka jingjia ha Mukroh sha ka Central Bureau of Investigation (CBI). Ia ki Judicial Commission ba la thaw da ki ar tylli ki Sorkar Jylla ban tohkit halor kane ka jingjia la pynkut noh shisyndon hadien ba u Myntri Rangbah ka Jylla Assam u Himanta Biswa Sarma bad u Myntri Rangbah ka Jylla Meghalaya u Conrad K. Sangma ki la iakynduh ban iakren ia pynbeit ia u pud u sam ha Khanapara.
“Lada ki aiti sha ka CBI ruh ka biang, tangba ka jingtohkit ka dei ban long kaba khuid. Ym tang katta, tangba ngi hap ban sngewthuh ruh ynda ladep ka jingtohkit, jop mano mano ruh ngim tip hynrei ioh ki briew jong ngi ha khappud kin dang shah pyndik. Kaba donkam eh ka long ba ngin don ia ki Pulit ki ban iada ia ki briew (jong ngi) ha khappud bad ki Pulit ruh kim dei ban shu ieng ha khapud ba shu peitkai ia ka jingshah thombor jong ki paradoh parasnam jong ngi hynrei ki hap ban iakhun,” la ong u samla Donal V. Thabah ha ka jingiakren bad u nongthoh khubor ha ka sngi Balang.
“Lada ka Nagaland ka lah, lada ka Mizoram ka lah, ka jylla jong ngi ruh ka dei ban lah,” la iaiban u samla Thabah.“ “Mynshem snem haba ngi pynlong ia ki jingiakhih, ki don ki jingpyntieng kohtympan ba kin khang ia ka Petrol, kin khang noh ia u khaw bad lada ngi tieng noh ia kata, na ka por sha ka por ngin shah pyniap. Lashai lada ki (Assam) lah ioh ia ka Mukroh kin nang kyntur bad lashai baroh kawei ka jylla kan hap biang sha kaAssam. Ngin hap ban pyrkhat bad ban puson bha ia kata. Kaba kongsan eh ka dei ka jingshngaiñ bad ka jingiada ia ki paradoh parasnam kiba sah ha khappud bad ka jylla Assam bad kumjuh ruh kiba sah ha khappud jong ka ri Bangladesh,” u la ong.
Haba kylli, u General Secretary ka KSU u la ong, “ka jingshongshngaiñ hi kam don, teng teng ka wan, teng teng ka leit. Ki jong ngi lei ki iaid la ka jong ka lynti ki trei ki ktah hynrei dei kitei (Karbi) na sha shilinag (Assam) kiba pyndik. Kumba jia ha Lapangap naduh ka por hyndai hyndai ki (Khasi-Pnar) rep ia u kba hangto bad ha ka por ba ki dang rep ia u kba ki (Karbi) shah hynrei ynda la dei ka por ot kim (Karbi) shah. Kaei ka jingthmu, ki thmu ban kurup ei ia u khaw ba ki la thung shitom da ki briew jong ngi.”
“Ngi hap ban pyrkhat ba kine ki jingshah pyndik ha ki thaiñ khappud, khamtam na Assam ka long kaei kaei kaba ngin shu sngap ngim lah. Na ka por sha ka por ngi la hiar sha khappud ban iakren bad ngi la pynlong ki jingialang bad don bynta lang bad ki. Kaba lah hi ban tehlakam ia ka jingthombor jong ki lehnoh, ki paidbah bad ki pulit bad Forest Guard (ka Assam) ka dei ka Sorkar Meghalaya,” u la bynrap.
U la ong shuh shuh ba ka jingiapynbeit ia u pud u sam ka dei ban long ba ki shnong Khasi hi ki dei beit ban hap hapoh ka jylla Meghalaya khang ba ka jingmut jong ka Hill State kan long kaba pura, kaba paka bad kaba jop.
