Shillong, Naiwieng, 24: Ka long kaei kaei kaba pynkyndit thret ïa ka Khasi Hills Autonomous District Council bad ïa ka Dorbar Shnong Laitkor kiba la lap tyngkreiñ ba uwei u bar jylla u la kamai jem haduh 15 snem kynthih hapoh u pud u sam jong ka shnong Laitkor khlem ka Trading License na ka District Council.
La lap ïa kane, hadien ba u Executive Member uba peit ïa ka tnat Trade ka KHADC Bah Gigur Myrthong ryngkat ki Pulit Enforcement ka KHADC bad ki nongkitkam jong ka shnong Laitkor ki la pynlong ïa ka jingkhynra Trading License ïa ki dukan bar jylla kiba la jyllei haduh katta katta ha kane ka shnong.
Ïa kane ka jingkhynra la sdang na Lad Nongkrem ter ter shaduh sha Kseh Bilat.
Ha kane ka jingkhynra Trading License la shem ba bun na ki dukan bar jylla kim don satia ïa ka Trading License bad la don uwei u bar jylla uba la kamai jem la kumba 15 snem ban khaïi beain khlem ka Trading Lisence. Na ka liang jong u Bah Gigur u la bthah ïa ki bar jylla ki bym don ïa ki kot ki sla bad ïa ka Trading License ba kin khang shwa ïa ki dukan jong ki bad ban leit mih sha ka ophis jong ka Council ban ïoh ïa ka laisen khaïi.
Ha kane ka jingkhynra la lap ruh ba ki don ki Khasi kiba kam trai ïa ki dukan jong ki bar jylla bad na ka liang jong ka Dorbar Shnong Laitkor ka la byrngem ba kan sa leh da kaba tyngeh bad ban tih bniah haduh ban da lap ïa ka jingshisha la kane ka jingkam trai ka long neem kaba shisha bad kaba shongnia.
“Ka jingwan jurip ka long hadien ba ka dorbar shnong ka la pyntip ba ki don ki bar jylla kiba wan khaïi hangne. Ngi la lap katto katne bad ki don ruh kiba shu pynshah kyrteng ha ki Khasi, ïa kata ngim lah ban tip hynrei ka shnong kan hap ban wad bniah,” u la ong.
Haba kylli, u la ïathuh ba ki don kumba 20 tylli ki dukan jong ki bar jylla kiba leh ïa ka kam khaïi khlem ka Trading License.
“Haba ngi tohkit, ki don ki (bar jylla) kiba pynïaid ïa ka kam khaïi la 15 snem, 16 snem bad ka long kaei kaei kaba sngewsih ba wat ka Dorbar Shnong ruh kam don jingtip. Ngin sa shim ïa ka sienjam ba ngi dei ban leh. Ngi lah batai ba kin wan mih sha ophis bad ngin sa leh ïa kaei kaba donkam,” u la bynrap.
Na ka liang jong ka Dorbar Shnong ka la pyntip ruh ba ki don ki bar jylla kiba trei bylla hapoh kane ka shnong bad ki bym pat shim wat ïa ka NoC na ka Dorbar Shnong.
“Naduh ba nga la shimti kum u Rangbah Shnong mynta la 4 snem eiei, ngi la pyrshang katba lah ban leh da ka bor jong ka Dorbar Shnong hynrei kine ki briew (bar jylla) kim sngap. Kim pyntip hi ruh wat ïa ka bor jong ka shnong bad ki shu ïakren sop sop tang bad ki trai jaka. Ki shu wai ïa ka jaka bad ki shu trei beit kumto,” la ong u Rangbah Shnong.
“Ki don ki nongshong shnong jong ngi kiba ai ïa ki jaka riehtngen ïa kine ki bar jylla bad kiba kam ba ka (kam) jong ki hynrei kaba ngi tip shai ka don ka jingleh Benami. Don ruh kiba buh la ka buh ïa ki bar jylla kum ki nongtrei ha ki karkhana bad kumta ter ter,” u la ong.
U la ïathuh ba ka Dorbar Shnong ka la pan jingkheiñ ruh ïa ki kyrteng jong ki nongbylla bar jylla kiba trei ha ki karkhana bad ha kiwei kiwei ki jait kam hapoh pud u sam jong ka shnong.
“Hynrei ki (bar jylla) sngap kuman bad kim pyntip eiei. Hadien ba ngi la shong ïa ka Executive Committee ngi la pyntip sha ka KHADC. Ngi maham da kaba tyngeh ïa kino kino ki (bar jylla) kiba leh ïa ka khaïi ka pateng hapoh u pud u sam jong ka shnong kim dei ban ïaid lait na ki bor jong ka shnong. Lada phi (Khasi) donkam ïa ki bar jylla kum ki nongtrei jong phi sngewbha da pyntip sha ka Dorbar Shnong ba ngin ïoh bishar bniah,” la ong shuh shuh u Rangbah Shnong.
“Nangne shakhmat phi baroh kiba khaïi pateng hapoh u pud u sam jong ka shnong kiba buh dukan bad kiba buh karkhana kin sngewbha ban ïatreilang bad ka shnong bad sngewbha wat nym ïaid lait ïa ka bor jong ka shnong namar lada nangne shakhmat phi dang ïaid lait ïa ka bor jong ka shnong lada phim pyntip ïa ka bor shnong ngin khang khyrdep beit,” la maham u Rangbah Shnong.
