Shillong, Naiwieng, 25: Ka kynhun ialehkai jong kaShillong Lajong FC ka la kiew sha ka kyrdan balai ha ka lympung ialehkai Hero I- League ba mynta ka samoi hadien ba ka la lah ban pynliem da 2-1 kol pyrshah ia ka Tiddim Road Athletic Union (TRAU) FC ha ka jingiakhun kaba la long ha ka sngi Saitjaiñ ha 1st Ground jong ka Shillong Sports Association, Polo.
Ka Shillong Lajong kumba ka la angnud, ka la urlong, wat hadien ba ka la shah thep nyngkong ha ka TRAU FC ha kane ka North East Derby I-League.
Ka TRAU FC ka la ioh ban pynkhih nyngkong ia ka jar lyngba u Robinson Singh Soraisam ha ka minit kaba 13 jong ka kyllastep bad ka Lajong ka la ioh ban pyniakhaid lyngba ka Penalty kaba u Hardy Cliff Nongbri u la thep ha ka 18 minit jong ka kyllastep.
Ka Shillong Lajong FC ka la ioh ia kane ka Penalty da ka jingktah u Sunil Benchamin ia ka bol da ka kti bad uba la ioh syndon da ka Red Card bad naduh ka 16 minit shaneng ka TRAU FC ka la hap ban ialehkai sa tang 10 ngut ha madan.
Ha ka jingiakhun ha ka kyllamiet ka Shillong Lajong FC ka la lah ban ialehkai bha bad ka pynjem khnap ia ka TRAU FC ha kaba bun ki kabu ki la sepei bad ki khlem lah ban pynurlong, hynrei khatduh ha ka 86 minit u rangialehkai jong ka Shillong Lajong u la ioh ban khyrwit ia ka bol kaba la dei beit beit ia u Thomas Singh Thounaojam u rangialehkai jong ka TRAU FC bad ka bol ka la rung sha ka kol jong u hi. Dane ka kol, ka Shillong Lajong FC ka la jam da 2-1 bad jop syndon ia ka jingiakhun ha kane ka lympung.
