Shillong, Naiwieng, 27: Haduh200 tylli ki kam ki lait ia kiba nang ban kren ia ka ktien Phareng ha ka Ri Slovakia, kaba don ha syndah bad ka ri Poland ha thain Europe.
U CEO & Founder Director, Asporea, Siliguri u Yash Gurung bad ki officer jong u ha ka jingiakynduh ia u Co-Chairman jong ka Meghalaya State Planning Board, ka Sorkar Meghalaya ha Shillong u Bah John F Kharshiing ki la pyntip ba kane ka kynhun ka kwah da ki samla na ki jylla jong kane ka thaiñ Shatei Lammihngi.
Kane ka kynhun na Siliguri ka long kaba don jingiadei ha ki ri baher bapher bad ki la pyntip ba ia mynta ki don 200 tam ne duna ki kam ha ka kharkhana shna kali Peugeot 208, Citroen C3, jong ka Company Stellantis, Slovakia ha ka jingsiew kaba T. 63,000 haduh T. 72,000 shi bnai bad ka don ruh ka jingsiew kaba heh ia ka extra time lada ki nongtrei ki dei kiba smat bad kiba trei shitom.
Ki la pyntip ba ka kynhun jong ki ka don ka jingiateh bad ka kynhun pynioh kam kaba heh na Kathmandu, Nepal kiba la don lypa ki jingiadei bad ka kharkhana shna kali, ha kaba ki don ka lad ban pynioh ia ki kam lada ki nongwad kam ki don ia ka jingtbit. Kane ka kharkhana kali ka dei kaba heh bad ki shna 62 tylli ki kali ha ka shi kynta bad ki pynmih haduh 1395 tylli ki kali shi sngi ha slovakia.
Ha ka jingiakynduh, ka kynhun ka la mynjur ia ki jingai jingmut jong u Bah John F. Kharshiing ba un sa pynbeit ia ka jingiakynduh bad ki heh jong ka tnad Labour ka Sorkar Meghalaya ban iakren sngewthuh ban iatrei ryngkat kumno ba ki samla ITI / Politechnic bad kiwei kiwei hapoh Meghalaya kin lah ban shim ia ka lad ka kabu ban mih shakhmat ban trei shitom ban poi sha kitei ki kam.
Ki la pyntip ruh ba ki don ruh ki kam ba bun jait kiba kane ka kynhun ka la don lypa ki jingiadei ha ki Ri bapher bapher ha kaba ka jingdawa ia ki nongtrei ka jur bha kum ki Nurse, ki nongtrei hapoh ki jaka sumar Hospital bad kiwei kiwei ha Japan bad Germany tangba ha kitei ki Ri donkam ban pas shwa ar level ha ka ktien Japan bad German.
Kane ka kynhun ka la pyntip ha u Bah John ba kine ki jingplielad ba ki nong india kin ioh leit sha kiwei ki Ri ki dei naduh ba u Myntri Rangbahduh ka ri u Narendra Modi u la wanrah ki polisi ban plielad ia ki nong india ban leit shabar lyngba ki jingiateh bad ki ri bapher bapher lyngba ka Ministry of External Affairs, ka Sorkar India khamtam namar mynta ka don ruh ka jingsdang duna ka jingdon paid ha kiba bun ki ri ka dewbah Europe.
