Shillong, Lber, 24: Ki rangïalehkai jong ka ri India bad ka ri Bangladesh ki la pyneh ïa la jong ki dohksah ha ka jingkilan met kaba khlem sangeh shwa ban mih madan ha ka jingïakhun na ka bynta ban ïaknieh rung sha ka lympung ïalehkai AFC Asian Cup ka ban sa long ha Jawaharlal Nehru Stadium, Polo ha ka sngi Baar ha ka por 7:00 baje janmiet.
Ha ka jingïakren bad ki lad pathai khubor kiba la wan khnang na ka ri Bangladesh kynthup ruh na ka jylla Meghalaya bad na kiwei kiwei ki jylla jong ka ri India, u head coach jong ka kynhun ïalehkai na ka ri Bangladesh u Javier Cabrera ryngkat bad u rangïalehkai ka kynhun u Jamal Bhuyan ki la pynpaw ba kum ka kynhun ki la pynkhreh bha ïalade. Kumjuh ruh u head coach jong ka kynhun ïalehkai ka ri India u Manolo Márquez bad u rangïalehkai u Sandesh Jhingan ki la ong ba kim lah ban shu khein sting ïa ka kynhun ïalehkai jong ka ri Bangladesh watla ka jingïakhun kan long ha la ka jong ka ri.
Kane kan dei ruh ka sien kaba nyngkong eh ba ka jylla Meghalaya kan sakhi ïa kane ka lympung ïalehkai phutbol kaba heh tam ha ka dewbah Asia bad ka ban sa long ha ka ri Saudi Arabia ha u snem 2027.
