Shillong, Rymphang, 25: Ka Employment Monitoring Cell jong ka Khasi Students’ Union (KSU) ha ka sngi Baar ka aiti da ka dorkhas hakhmat ki dkhot jong ka Governing Council kiba kynthup naduh ki Nongbishar jong ka Iingbishar Megha laya High Court (Senior Judges), Registrar General ka Megha laya High Court, u Advocate General ka Megha laya High Court, Chairman ka Megha laya State Bar Association, Registrar NLU, u Chief Secretary ka jylla, ki Secretary jong ka tnad Law, Education bad Finance.
Lyngba ka dorkhas, ka KSU ka la pynpaw ïa ka jinglehdonbor jong u Vice Chancellor jong ka National Law University, Megha laya u u Prof. Indrajit Dube da kaba kynnoh ba u la shu thungkam khlem da bud ryntih ïa ka Advertisement bad kumjuh ka jingshna hi ïa ki post ban pynrung kam ïa ki briew kiba nabar bad ïa ki post ba pyllait Advertisement ba khlem ki Advertisement u Vice Chancellor u shu thung briew sopsop.
Ka Seng ha shuwa kane ka la ïakynduh bad pan jingshai na u Vice Chancellor bad ha ka jingïakren bad ki nongïalam ka seng ha 14 tarik mynta u bnai u la kynnoh ba kino kino ki post shuwa ban thung u la kam ba la ïoh jingbit na ka Governing Council, hynrei ka seng ka la lap ba kam shym long kumta bad dei halor kane ka nongrim ba ka seng ka pynsngew sha ki dkhot jong ka Governing Council.
Ha ka dorkhas, ka seng ka la kynnoh ruh halor ka jingthung kam jubor ïa u Gurpreet Singh ha ka post Deputy Registrar khlem da pynbna ïa ka result bad khlem bud ryntih ïa ka Megha laya State Reservation Policy. Ka Seng ka la pynpaw ruh ba dei ba ïaid katkum ka Advertisement bad kumjuh kat kum ka Reservation Policy dei ban ïoh da u Khasi ïa kane ka kam hynrei lehse ba u VC um kwah ïa ki Khasi u la shu thung ïa u Gurpreet Singh khlem da pynmih ïa ka result.
Ka KSU ka la kynnoh ruh ba ki kam nonghikai kum ka post Assistant Professor bad Associate Professor ruh la shu thung ïa ki briew kiba nabar kiba don jingïadei bad u Vice Chancellor bad ki briew jong ka Sorkar khlem da pynmih ïa ka resol kaba tikna bad kynnoh shuh shuh ba kine ki briew kiba shah thungkam ha kine ki post kim dei kiba la biang pura katkum ki kyndon jong ka UGC ne kiba la pyndep ïa ka PhD ha ka por ba la thep kam ïa ki.
Ban pynskhem ïa kaei kaba la ujor, ka KSU ka la ai nuksa ïa kawei ka nonghikai kaba trei kum ka Assistant Professor kaba kyrteng ka Ankita Chakraborty ha kaba la kynnoh ba ïa kane ka nonghikai la thung da u Vice Chancellor watla kam pat dep ïa ka kyrdan PhD ha ka por ba ka thep ka kam bad khlem ka teaching experience.
Ka Seng hadien ba la wad ïa ka daw tynrai ba balei la thung ïa ka Ankita Chakraborty, ka la kam ba kane ka briew ka pule ne pyndep ïa ka PhD hapoh ka Dipa Dube kaba dei ka kurim jong u Vice Chancellor na IIT Kharagpur ha kaba ka kurim jong u VC ka hikai.. “Ka long kumjuh ïa bun ngut ki nonghikai kiba don ha NLU Megha laya, bun na ki, ki dei ba pas na ka University ba la pynhikai da ka kurim jong u Vice Chancellor,” la kynnoh shuh shuh ka KSU.
“U Vice Chancellor u la thaw ruh ïa ki aiñ katkum ka mon jong u kiba aibor ïa u ban thungkam ïano ïano ruh khlem da donkam ban pynbna ïa ka Advertisement, katkum ka jingsngewbit ka jong u. Kum kita ki ain dei ban pynduh pyndam shi syndon, namar ka long kaba noh shiliang bad ha kajuh ka por ka pynsyrwa ïa ka pisa jong u paidbah bad jong ka jylla,” la kynnoh ka KSU.
Ka Seng ka la kam ruh ïa ki aiñ jong ka NLU ym shym la pyllait paidbah namar ka jingtieng ïoh paw ïa ki kam jakhlia jong u Vice Chancellor.
“Wat haduh ïa ki RTI ba la pan na ka liang jong ka Seng bad ki riewshimet ruh une u Vice Chancellor u bat ïa kine ki RTI bad um shym ailad ïa u Public Information Officer (PIO) ban jubab ïa ki RTI. Kine kiei kiei baroh ki dei ki jingleh donbor na ka liang u VC ban pynïaid ïa ka NLU katkum ka jingmon ka jong u kum ka Private University lajong. Wat ha ki kam pisa pilaiñ ruh ka long ka don ka jingbym khuid ha kane ka University,” la kynnoh ka KSU.
Ka Seng ka kyntu ïa baroh ki dkhot jong ka Governing Council ba kin buh jingkylli ïa ka jingleh donbor da u Vice Chancellor bad kyntu ruh ïa ki bor Sorkar ban bishar ïa ki kam ba u leh hapoh ka University bad dawa ruh ba dei ban weng mardor noh ïa u.
La pyntip ruh da ka KSU ba ka jingïalang jong ka Governing Council kan sa long ha ka 26 tarik mynta u bnai ha NLU Campus.
