Shillong, Nailar, 02: Arngut ki riewniam Sister ka Balang Catholic na Kerela ryngkat bad u Sukaman Mandavi kiba la shah kem ha Bilaspur, Chhattisgarh, halor ka jingkynnoh ba ki donkti ha ka kam khaïi briew bad ban pynkylla niam jubor, ki la ïoh jamin ha ka sngi Saitjaiñ na ka Special Court jong ka National Investigation Agency (NIA).
Ïa kine ki arngut ki riewniam, ka Sr. Preethy Mary bad ka Sr. Vandana Francis, kiba la mih na Durg Jail la pdiang burom da u MP ka CPI u P. Sandosh Kumar ryngkat ka jingsynran lang jong u President ka BJP na Kerela u Rajeev Chandrasekhar, ki nongïalam ka Congress bad kiwei kiwei ki riewsaiñpyrthei.
Katkum ka jingïathuh jong u muktiar u Gopa Kumar, uba mihkhmat ïa ki arngut ki Sister ha Kashari, u la ïathuh ba la pyngat ïa kine ki arngut ki riewniam ha ki kyndon ba eh bha kata ha ka Section 143 jong ka Bharatiya Nyay Sanhita (BNS) bad ka Section 3 jong ka Orissa Freedom of Religion Act, 1967.
“Ngi la ïasaid ba ka Section 143 hapoh ka BNS, kaba ïadei bad ka jingïalum paidbah kam don jingïadei eiei bad ka jingkhaïi briew, kam long ruh kaba lah ban pdiang ha kane ka mukotduma. Da kaba pynshong nongrim halor kane ka jingïasaid, ka Kashari ka la ai jamin noh ïa ki,” ong u Kumar ha ka jingïakren bad ki lad pathai khubor.
Ka Kashari ka la bthah ruh ïa ki arngut ki riewniam ba kim dei ban leit jingleit shabar ka ri Inda bad la bthah ruh ba ki dei ban siew ïa ka Bail Bond kaba mar T. 50,000 hajar marwei.
Ka Sr. Preeti Mary bad ka Sr. Sister Vandana Francis, kiba dei na ka jingïasyllok Assisi Sisters of Mary Immaculate ki dei kiba trei ha ka Hospital ha Agra.
Ha ka 26 tarik, Naitung, katba ki dang synran ïa ki lai ngut ki samla kynthei na Narayanpur District, Chhattisgarh ban leit sha Agra ban trei kum ki nongshet ha ka Convent, ki arngut ki sister bad uwei u rangbah u Sukhman Mandavi, ki la shah pakhang lynti ha Chhattisgarh Railway Station ha ki dkhot ka Bajrang Dal.
Da kaba pdiang ïa ka jingujor jong ka Bajrang Dal, ki Pulit ki la ïalam noh ïa ki arngut ki Sister bad ïa u Sukhman Mandavi sha thanat halor ka jingkynnoh ba ki dei kiba donkti ban khaïi briew bad ban pynkylla niam jubor.
Tang hapoh khyndiat kynta ki Pulit ki la ïalam ban tian bishar ha Kashari kaba la phah set ïa ki ha Judicial Custody.
