Shillong, Naitung, 08: Ka karkhana saiñ nar kaba don ha ka shnong Riwiang ïa kaba la tip kum ka Shakhambari Ferro Alloy Private Limited kalaïoh ban plie biang hadien ba la shah khang khyrdep la kumba katto katne bnai mynta ha ka Meghalaya State Pollution Control Board namar ka jingpynkheiñ aiñ.
Ka jingïohlad ban plie biang ïa ka karkhana ka dei ruh ba hadien ba ka Meghalaya State Pollution Control Board ka la weng noh ïa ka hukum ba la khang khyrdep bad ai ruh ïa ka Consent to Operate sha ki bor pynïaid jong ka karkhana.
Hadien ba la plie biang ïa ka Karkhana ha ka 7 tarik,Naitung 2025 na ka liang jong ki nongthoh khubor ki la leit ban ïakynduh ïa u Deputy Commissioner jong ka West Khasi Hills District bad na ka liang jong u DC ruh u la pynpaw ba u la ïoh ïa ka shithi na ka Meghalaya State Pollution Control Board ba ladep ban weng ïa ka hukum ban khang bad la shah ban plie biang ïa ka karkhana.
Ha kaba ïadei pat bad ka jingshah ktah jong ki paidbah nongshong shnong ha ka koit ka khiah na ka jingdon jong ka Karkhana, u Deputy Commissioner u la ong ba watla ka la don ka jingpynsngew hynrei khlem da pynshisha lyngba ki doctor yn ym lah ban ong eiei bad u la ong ruh ba lada ka don kaba kum kata ka shnong ka dei ban ai da ka jingthoh ryngkat ka kyrteng jong ki nongshong shnong kiba shitom bad na ka liang jong ki bor District ruh kin sa phah ïa ki doctor ban pynlong ïa ka jingeksamin.
Shuh shuh u Deputy Commisioner u la ong ba ki synshar District ki don da ka District Task Force kaba kynthup lang ïa ki Magistrate bad ki Pulit kiba ju peitngor ïa ki kam beaiñ la long na ka karkhana ne ha kano kano ka bynta.
