Shillong, Nailar, 31: Ka Food Safety and Standards Authority of India (FSSAI) ryngkat ka Department of Food Safety, Meghalaya bad ka Federation of Street Vendors of India, ha ka jingïatreilang bad ka Nestlé India hapoh ka FoSTaC (Food Safety Training & Certification), ka la pynlong ïa ka jingai jinghikai halor ka phang, “Training for Street Food Vendors” ha ha Gurudwara, Shillong.
Ha ka jingïalang Director jong ka Tourism ka Kong B.L. Pakynteiñ ka la long kum ka kongsan.
Haba ai jingkren ha kane ka sngi, ka la ong ba ki nongdie jingbam harud surok ki long kiba don bynta ha ka imlang sahlang namar ki ai jingshakri sha kiba bun.
Ka la pynpaw ruh ba ka jinghikai kum kane ka ai jingtip kyrpang shaphang ka jingkhuid jingsuba, ka jingpynbiang bam kaba shngaiñ bad ka jingpynneh ïa ka jingshaniah na ki paidbah.
Ka la kyntu ruh ïa ki nongdie jingbam ban shimkhia da kaba bud ryntih ïa ki kyndon kiba ïadei bad ka jingkhuid jingsuba, khnang ba ka jylla Meghalaya kan paw kum ka jaka bam kaba shngaiñ bad suk mynsiem ïa ki nongwan jngohkai pyrthei.
Kiwei pat kiba la ïadonlang bad ai jingkren ki kynthup ïa u Surojit Mukherjee, Head – Branch Corporate Affairs, Nestlé India Ltd., ka Kong D.B.S. Mukhim, Deputy Commissioner (Food Safety) – Enforcement, Meghalaya bad ka kynhun na ka Art of Living Shillong.
Ka jinghikai ka dei kawei na ki jingpyrshang ban pynkupbor bad pynlong ki nongdie jingbam harud surok ban tip bad ban don ka jingkitkhlieh ha kaba ïadei bad ka jingleh khuid ïa ka bam na ka bynta ka jingmyntoi jong ki paidbah bad ki nongwan jngohkai pyrthei ha jylla.
