Shillong, Jylliew, 13: Ka Khun Hynniewtrep National Awakening Movement (KHNAM) kaba la phah ïa ka jingai jingmut sha ka Expert Committee on State Reservation Policy ha ka sngi Palei ka la ai jingmut ban mang 50% ïa ka Bhah Thungkam na ka bynta ki jaidbynriew Khasi bad Jaiñtia.
Ha ka shithi ba la aiti sha ka Committee, u President ka KHNAM Bah Pyndapborthiaw Saibon u la ong ba ka jingai jingmut ka long ruh ba 80% dei ban ai sha baroh ki lai tylli ki jaidbynriew Khasi, Jaiñta bad Garo da kaba pynshong nongrim katkum ka Merit.
U Bah Saibon u la ong ba katkum ka Para 1 jong ka Policy, ïa ka bhah kyrpang dei ban shim katkum ka jingbun briew jong ki lai tylli ki jaidbynriew hapoh ka Jylla, kata hapdeng ka jingbunbriew ki Khasi bad Jaiñtia bad Garo.
“Katkum ka Khanasamari 2011, ki jaidbynriew Khasi bad Jaintia ki don ym duna 5, 78, 918 lak ngut ka jingbun briew ban ïa ki jaidbynriew Garo bad kane ka jingïapher kan kiew haduh 9,49,756 lak ynda la pyndep ïa ka jinglum khanasamari kaba bud. Namarkata, dei ban shim katkum ka ka jingïapher ha ka jingbun briew haba peit ïa ka bhah kyrpang,” la ong u Bah Saiborn.
“Lane, ban kiar na ka jingïashrut hapdeng ki jaidbynriew ritpaid kiba shong hapoh ka jylla, lah ban mang 80% ïa baroh ki lai tylli ki jaidbynriew (Khasi, Jaiñtia & Garo), da kaba pynshong nongrim katkum ka Merit. Kane ka pynneh ïa ka kyndon jong ka ‘Maintenance of Efficiency in the Administration’ katkum ba la kdew ha ka Para 1 jong ka Policy,” ong u Bah Saiborn bad bynrap, “lane, 50% dei ban bhah tang sha ki jaidbynriew Khasi bad Jaiñtia.”
Ka KHNAM ka la ai jingmut ba dei ban pyndam noh ïa ka kyntien “Autonomous State” na ka Para 1 jong ka State Reservation Policy 1972, namarba ïa ka jylla Meghalaya la pynbna kum ka jylla Meghalaya bapura ha ka 2 tarik, Kyllalyngkot, 1972.
Ka la kdew ruh ba la donkam ban pynbeit thymmai ha ka Para 2 jong ka Policy da kaba pyndam noh ïa ka kyndon kaba rah shakhmat ïa ki kam ba lait thylli. Da kaba rah shakhmta ïa ki kam ba thylli ka long pyrshah ïa ka jingthmu jong ka Policy ban pynbeit ïa ka Administrative Duties katkum ba la kdew ha ka Para 1 jong ka Policy. Namarkata, hadien ka kyntien ‘Then such vacancies will be available to other’, ïa baroh kawei ka Para 2 jong ka Resolution la dei ban pyndam lut ploiñ.
Ka party ka la ong, ha ka Office Memorandum jong ka 28tarik Jymmang, 1974 ka plie lad ïa ki nongthep kam kiba nabar ka jylla ban thep ïa ki kam ba thylli ba la mang kyrpang ïa ki Garo. Kum ïa kane ka kyndon ym dei satia ban ailad la ka long ha kano kano ka rukom khnang ban pynthikna ba ki nongshong shnong ka jylla kin ïoh jingmyntoi na ka Policy.
Ka la ong ba ha ka Office Memorandum kaba 18 tarik, Nohprah, 1972 ka ailad ïa ka bhah kyrpang ïa ki post ha ki District level, ha kaba kiba mynta kim shym la shah pynkynriahkam shabar ka district hadien ba la shah thungkam, dei ban don ïa ka Combined Reservation kaba 80% jong ki post na ka bynta ki Garo, Khasi-Jaintia ha ka jaka ba mang kyrpang la ka jong mar 40% na ka bynta ki Garo bad Khasi-Jaintia.
“Ïa kane ruh dei ban pynbeit thymmai da kaba kdew shai ba ki post ha ki district level ha kaba kiba mynta kim lah ban shah pynkynriah kam shabar jong ka district hadien ba la shah thungkam, 80% ka bhah kyrpang dei ban mang na ka bynta ki Khasi-Jaintia ha rilum Khasi bad rilumj Jaintia bad 80% ka bhah kyrpang dei ban mang kyrpang ïa ki Garo tang ha rilum Garo,” la pynpaw ka shithi na ka KHNAM ba la aiti sha ka Expert Committee.
Katkum ka KHNAM, ïa mynta, ki district level posts ha Garo Hills la shu pyndap beit tang da ki jaidbynriew Garo katba ha Khasi bad Jaiñtia Hills Districts ki jaidbynirew Garo ki ïohlad ban thepkam lang bad ki jaidbynriew Khasi-Jaiñtia.
Ka party ka la ong ba ïa ka State Reservation Policy 1972 dei ban pyntreikam ruh ha ki Semi-Government Department/Corporations/Prganized Private Sectors/Private Establishment khnang ban plie ïa ki lad ïohkam na ka bynta ki samla ha ka jylla.
Shuh shuh, ka party ka la pynsngew ruh ïa ka jingdonkam ban pynthikna ba ka Policy ka thmu tang na ka bynta ka Bhah Thungkam hynrei ym na ka bynta kiwei pat ki jingthmu.
“Ha ki snem ba la leit noh, ïa ka State Reservation Policy 1972 la pyntreikam wat ha ka jingïoh rung ban pule ha ki kyrdan kiba kham shalor, khlem ka jingïoh jingbit kaba thikna. Namarkta, la ai jingmut ba ïa kane ruh dei ban pynbeit noh mardor da kaba kdew shai ba ka State Reservation Policy 1972 ka thmu tang na ka bynta ka bhah thungkam bad ym na ka bynta kiwei pat ki jingthmu,” la ong ka KHNAM.
“Ngi kwah ban kdew shuh shuh, na ka daw ka jingïapher ki jingsngew ha kaba ïadei bad ka jingpynbeit thymmai ïa ka SRP 1972 na kiwei pat ki jaidbynriew, ka lah ban mih ka buit ban shu pynslem kai da kine ki jaidbynriew. Namarkata, la ai jingmut ba ïa kane ka kam dei ban pyndep noh kham kloi katba lah,” la bynrap shuh shuh ka KHNAM.
