Shillong, Lber, 20: Ka Seng Samla Mawlai Pyllun (SSMP) ka la ai jingmut ïa u Director jong ka Drug Reduction Elimination and Action Mission (DREAM) ban ïakren bad ka Sorkar Jylla ban tei ïa ka Rehabilitation Centre ba sumar ïa ki briew ba la im kyrni ha jingdih rok ha ka jaka ba don ka ktem CRPF ha Mawlai.
Ka SSMP ka la pynsngew ïa kane ha ka jingïalang kaba la khot da u Director jong ka DREAM u Bah Francis Kharshing bad ki seng samla shnong bapher bapher kiba don ha jylli jong ka nongbah Shillong kaba la long ha ka sngi Palei.
U President ka SSMP Bah Bah Samuel Biam ha ka jingïakren bad ki lad pathai khubor u la ong, “baroh ki tip ba ki Rehabilitation Centre ba la pynïaid da ki riewshimet hapoh ka Jylla ki shim oh da ka dor kaba rem ban sumar ïa kiba la im kyrni ha u drok bad kane ka la buh jingeh bha ïa ki longiing kiba duna ka ïoh ka kot ban phah shah sumar ïa ki khun kiba la ngop ha ka jingkyrni dih drok.”
U Bah Biam u la ïathuh ba ki paidbah jong ka shnong Mawlai naduh ki snem ba ladep ki la dawa ïa ka Sorkar ban pynkynriah noh ïa ka ktem CRPF sha kawei pat hynrei haduh mynta kane ka jingdawa kam pat urlong.
“Ngi la ai jingmut ha u Director jong ka DREAM ban tei noh da ka Rehabilitation Centre ha kane ka jaka ba don ka ktem CRPF namarba kane kan long ka jingkyrkhu ïa ki paidbah khamtam ïa ki longïing ki baduk ban phah sumar ïa la ki khun kiba la im kyrni ha u drok,” la pynpaw u Bah Biam.
U la ïathuh ba ki longïing kiba don ïa ki khun kiba la im kyrni ha u drok ki ju pynsngew ïa ka jingjynjar jong ki ban phah sumar ïa la ki khun sha ki Rehabilitation Centre ba pynïaid da ki riewshimet namar ka jingrem palat ka bai sumar.
“Ha ka jingïalang, ki ophisar ka DREAM ki la pynnsngew ba ka don ka lad bad lynti ban map ne pynduna ïa ka bai phah sumar ïa ki samla kiba la kyrni drok,” la ïathuh u Bah Biam.
