Shillong, Naitung, 13: U Special Officer ba la thung da ka Iingbishar Meghalaya High Court u la ai jingmut ïa ki bor synshar ka East Khasi Hills ban ym pat kyndang ïa ki nongdie madan na Khyndailad.
U Senior Advocate Subhasis Chakrawarty, ha ka shithi ba la phah sha ka Deputy Commissioner ka Kong R.M Kurbah ula pynpaw ba ka hukum ba la pynmih da ka Iingbishar ha ka 3 tarik Naitung, ka la bthah ban pynkhreh ïa ka thup kyrteng jong ki nongdie madan ba la ïoh jingithuh ne ba la don laisen da kaba ïasyllok shwa bad ka Hawkers’ Association bad ki bor synshar.
Ïa ka thup kyrteng, katkum ka jingbthah jong ka Iingbishar, ym pat lah ban pynkhreh, kaba pynlong ïa ka jingdon jong ki nongdie madan ym pat lah ban pynthikna bha.
U Special Officer u la kynthoh ba kano kano ka jingpynkynriah ïa ki nongdie
madan ha kum kane ka khep kan long kum ka jingpynkheiñ ïa ka hukum jong ka ïingbishar High Court.
Halor kane, u Special Officer u la ai jingmut ïa ka Deputy Commissioner ban sangeh shwa na ka jingpynkynriah ïa ki nongdie madan tad haduh ban da pyndep shwa ïa ki jingbthah jong ka Iingbishar High Court.
“Ïa kane ka jingbthah jong ka Iingbishar High Court ym pat lah ban bud ryntih bad kumta ka jingkylli ka long mano ba dei ki nongdie madan ha surok ki bym don laisen ha ka thaiñ Khyndailad kaba ym pat lah ban pynthikna. Kumta lada pynlong ïa ka jingpynkynriah ha kum kane ka khep, kan long ka jingpynkheiñ kaba shai ïa ka hukum ba la bthah da ka Iingbishar High Court. Kumta, la ai jingmut ba ym pat dei ban pynkynriah ha kum kane ka khep,” ong u u Chakrawarty haba ka jubab ïa ka shithi jong ka Deputy Commissioner kaba la phah ha ka 8 tarik, Naitung kaba la phah sha u Chief Executive Officer (CEO), jong ka Shillong Municipal Board (SMB).
Ha ka hukum kaba la pynmih ha ka 3 tarik, Naitung, ka Iingbishar ka la ong: “(ii) Hapoh u Special Officer bad da ka jingïamir jingmut bad u General Secretary, Hawker’s Association, ki bor synshar shnong bad ki bor Pulit kin pynkhreh ïa ka thup jong ki nongdie madan kiba la ai bor ne kiba la ai laisen ïa kiba la pyntip ba ki don kumba 349 ngut.”
Ka Iingbishar ka la bthah ba la shah ïa ki nongdie madan ba la ïoh laisen ban die jingdie ha ka thaiñ Police Bazar tang hapoh khyndiat kynta (12:30 mynsngi haduh 2:00 baje noh sngi bad 7:30 baje janmiet haduh 9:00 baje mynmiet), da kaba kular ba kim bit ban tam palat ïa ka por ba la buh bad ban pynthut ïa ka leit ka wan jong ki kali ne jong ki briew. Yn ym shah ïa ki nongdie madan ki bym don laisen ban die ïa ki mar ki mata ha kane ka thaiñ.
Ka Iingbishar ka la bthah ruh ïa ki nongdie madan ba kin kynriah sha ki jaka die madan ba la pynbiang da ki bor synshar bad kiwei pat ki nongdie madan ki lah ban nang aplai ïa ka laisen.
La bthah ïa u Special Officer ban ka jingpyntreikam ïa ka hukum jong ka Iingbishar ka dei ban long da kaba suk ba saiñ bad ban phah ïa ka kaiphod shwa ka 5 tarik, Nailar, 2025.
