Shillong, Nailar, 23: U Lamphang jong ka ïingdorbar Thawaiñ u Thomas A Sangma ha ka sngi Thohdieng u la ong ba haduh mynta um pat shim ïa ka rai halor ka jingthung ïa u Nongïalam ba thymmai jong ka Liang Pyrshah hadien ba ka Congress ka la sa tang uwei u MLA hapoh ka ïingdorbar Thawaiñ kaba don 60 ngut ki dkhot.
Katkum ka jingong jong u, kam don kano kano ka Liang Pyrshah kaba la ai kano kano ka jingai jingmut halor kane ka mat.
Ha ka jingïakren bad ki lad pathai khubor, u Sangma u la ong ba shen ka ophis jong u ka lah ban pynmih ïa ka jingpynbna ba la Denotification Order pyrshah ïa u MLA ka Congress na Mylliem Constituency u Bah Ronnie V. Lyngdoh kum u nongïalam ka Liang Pyrshah.
“Nga tharai ba baroh ki tip ba u nongïalam ba mynta ka Liang Pyrshah u don sa tang marwei hapoh ka ïingdorbar Thawaiñ namarkata ka ophis jong u Lamphang kan hap ban weng noh ïa u. (Ha kajuh ka por) nga dang ap ïa u (Bah Ronnie) ban aiti ïa ka shithi risaiñ khlem da donkam ban weng ïa u,” u la bynrap.
Haba kylli hato ka shuki Nongïalam ka Liang Pyrshah kan leit sha ka TMC kaba ka party kaba kham bun paid ha ka Liang Pyrshah, u Lamphang u la ong, “ïa kata ngam lah ban ong namarba ym pat don wat tang uwei ruh na ki party kiba don ha ka Liang Pyrshah uba la aiti ïa kano kano ka tyrwa na ka bynta kata. Kumta, nga lah ban pynslem ban shim ïa ka rai bad ngan dang hap ban bishar shwa ïa kane ka kam. Khlem da don mano mano ba ai jingmut ngam lah ban shim ïa ka rai ban thung ïano ïano.”
“Haduh mynta kam pat don kano kano ka jingai jingmut na kano kano ka party na ka Liang Pyrshah kumta ka ai por ïa nga ban pyrkhat bad ban bishar bniah ïa ka jingtreikam jong nga ban leh ïa kaba donkam,” u la bynrap.
Shuh shuh, u Lamphang u la ong, “ban don ïa ka Liang Pyrshah donkam 10% na ka jingdon jong ki dkhot hapoh ka ïingdorbar Thawaiñ baroh kawei hynrei kumba long mynta ym don kawei ruh na ki party kiba shong ha ka Liang Pyrshah kaba kot ïa kata ka jingkheiñ kaba donkam kumta kam da donkam ïa nga ban shim rai kyrkieh hynrei nga dang hap ban bishar bad shim shwa ïa ka por jong nga.”
“Dang shen, wat ha ka Parliament ruh kam don ïa u Nongïalam ka Liang Pyrshah hynrei ngam ong ba ngan shim ïa kijuh ki sienjam,” u la ong.
