Shillong, Nailar 07: Ka sorkar jylla ha ka sngi Palei ka la mynjur ïa ka jingpynbeit ïa ka Delegation of Financial Powers Rules 2006, kaba ai por ha u Joint Secretary jong ka tnad District Council Affairs (DCA) haba ïadei bad ka jingpyntreikam ïa ka pla tyngka.
Kane ka rai ka long ban pynbeit pynryntih ïa ka rukom sam bhah sha ki lai tylli ki Autonomous District Councils (ADCs) kiba don ha ka Meghalaya.
Haba kren bad ki lad pathai khubor hadien ba la wai ka jingïalang jong ka kynhun Myntri, u Myntri Rangbah ka Jylla Conrad K Sangma u la ïathuh ba ka tnad DCA nangne shakhmat kan treikam noh kum ka tnad ba dei peit (nodal department) na ka bynta ban pyllait ïa ka bhah sha ki district council. U ong ba kane ka sienjam kan weng noh ruh ka jingbunkam jong ki council ban leit buddien na ki tnad bapher bapher jong ka sorkar jylla.
Shwa kane, u Myntri Rangbah u la ong ba ki council ki ju ïoh lane ki dang ïai bteng ban ïoh pdiang ïa ka bhah na ka transport department, mining department bad ruh na ka forest department. Kumta u ong ba ha kano kano ka por ba ki leit buddien ban ïoh ïa katei ka bhah ki hap ban leit na baroh lai jaka ne ki lai tylli ki tnad sorkar bad kane ka pynlong ïa ka jingtreikam kaba kham eh.
“Kumta, ngi la rai noh ba kum ka sorkar ngin pynsuk noh ïa kane ka rukom pyllait ïa ka bhah bad ba ka DCA kan long noh ka tnad kaba dei peit na ka bynta kine ki jingpyllait ïa ka bhah sha ki district council,” u la ong.
Ha kane ka sngi, ka Kynhun Myntri ka la mynjur ruh ïa ka jingpynbeit ïa ki hynniew tylli ki service rules kiba kynthup ïa ka : Meghalaya Subordinate Treasury Accounts Service Rules, Meghalaya Urban Affairs Service Rules, 2024, Meghalaya Nursing Homes & Licensing Registration Rules, 2015, Meghalaya Judicial Service Rules 2006 and Meghalaya Judicial Rules, 2015, Meghalaya Police Telecommunication Service Rules, 2010, Meghalaya Directorate Establishment Administration Rules, 2005.
