Shillong, Jymmang, 14: U Myntri ka Sorkar Jylla Bah Kyrmen Shylla uba long ruh u MLA jong ka UDP na Khliehriat Constituency ha ka sngi Balang u la ong ba ha ka jingsngew jong u shimet u kwah ba ki paidbah jong ka rilum Jaintia hi kin rai la ka jingtyrwa ban wanrah ïa ka lynti Rel kan pynmyntoi ne kam ai jingmyntoi satia ïa ki.
Ha ka jingïakren bad ki lad pathai khubor, u Bah Shylla u la ong ba katkum ka jingsngew jong u shimet, u kwah ba ki paidbah ka rilum Jaintia hi kin shim ïa ka rai halor ka lynti Rel.
U la pynskhem ba ka Sorkar Jylla ka dei ban pynlong ïa ka jingpynsngew paidbah khnang ba ki paidbah kin dup lah ban pynpaw ïa ki jingsngew bad ïa ki jingai jingmut halor ka jingthmu ban shna lynti rel ha East Jaintia Hills District. “Ngi dei ban don ka jingpynsngew paidbah bad ai ba ki paidbah kin rai (halor kane ka mat) namarba kam dei ka kam jong u Bah Kyrmen ne uno uno ban rai, ai ba ki paidbah kin rai la ka rel kan ai jingmyntoi ne em ïa ki bad ïa ka thaiñ,” ong u Bah Shylla.
U Myntri u la la pynskhem shuh shuh da kaba ong, “lada ki paidbah ki ong em ïa ka lynti Rel naduh kata hi ka sngi ngi dei ban buh syndon da u dak sangeh (ïa kane ka mat). Lada ki paidbah ki ong haoid, balei tang ka Sorkar ka dei ban kyrshan, balei ym ki sengbhalang, balei ym kiwei pat ki jaitbynriew bapher bapher?”
Haba kylli, u Bah Shylla u la ong, “ngi la ïohsngew ïa ki sur bapher bapher bad ki jingmut bad ki jingkynthoh ki bapher bapher halor jong ka (mat lynti Rel) hynrei kiba kham bun paid kin jop hi ha kaba kut.”
“Namar kata, ngin ieh ha ki paidbah ban rai. Nga don ka jingsngew ba lada ki paidbah ki kwah shisha, ka dei ban jia, lada ki paidbah ki pyrshah, balei (ngin pyntreikam ïa ka). Kane ka long namar kano kano ka kam kaba ngi leh, ka dei na ka bynta ki paidbah. Ngi dei ki shakri jong ki bad kum ki shakri, ka dei ka kamram jong ngi ban pynbiang ïa ki jingdonkam jong ki bad ngim dei pat ban pyrshah ïa ka mon jong ki,” u la ong shuh shuh.
