Shillong, Rymphang, 25: U nongïalam jong ka United Democratic Party (UDP) u Bah Kyrmen Shylla uba long ruh u Myntri ka Sorkar Jylla u la ong ba dei ban ailad ïa ki paidbah ka rilum Jaiñtia ba kin shim rai halor ka mat lynti Rel khlem ka jingtuklar da ki bor kiba nabar.
“Nga kwah ban ïohi ba kam dei ban satia ka jingtuklar nangno nangno. Ai ba ki paidbah (ka rilum Jaiñtia) ki rai (halor ka lynti Rel),” ong u Bah Shylla ha ka jingïakren bad ki lad pathai khubor haba jubab ïa ka jingkylli halor ka jingtyrwa ba thymmai ban shna ïa ka lynti Rel kaba jrong 180-kilometre kaba pynïasoh na lad Chaparmukh, Assam sha nongbah Jowai, Meghalaya.
Watla ka jingïasyllok ka dang ïaid shaid shai, u MLA jong ka Khliehriat ula ong ba donkam ban pynlong da ka jingïalang kaba heh ha kaba baroh, khamtam ki trai shnong na ka thaiñ ba kin ïa shim bynta bad ban shim rai halor ka jingtyrwa.
“Shu buh lada ki kwah ban wan ka Rel sha Jowai, ai ba ki paidbah ka Jowai kin rai bad lada ka ïaid lyngba na ka thaiñ jong nga, ai ba ki paidbah jong nga kin rai la ki pdiang ne kim pdiang. Kam dei ban don ka jingtuklar na kiba nabar. Kata kaba nga kwah ban ong,” la pynpaw u Bah Shylla.
Haba kylli hato lada don kano kano ka jingtuklar na kano kano ka liang, u Myntri u la jubab da kaba ong, “ngam lah ban ong kan don lane kam don (ha ka jingïohi jong nga) hyrnei nga shu ong lada ka don kum kata, kim dei ban tuklar hynrei ai ba ki trai shong kin rai namarba ki kham tip kham bha ïa ka kamai kajih jong ki.
Shuh shuh u Bah Shylla u la ong ba u kloi ban ïeng bad ki paidbah bad halor ka rai ba kin shim halor ka lynti Rel.
“Kum u nongmihkhmat ka thaiñ ngin hap ban ïakren shwa bad ki paidbah nongshong shnong. Lada ki ong em, kata ka mut ba ngin ieng pyrshah beit ïa ka Sorkar lada ki pyrshang ban wanrah jubor ïa ka Rel. Lada ki paidbah ki ong, haoid, ngin ieng lang ryngkat bad ki paidbah bad ban pan ka. Nga don beit bad ki paidbah, lada ka long haoid, ne em ruh, nga don lang beit bad ki,” u la pynshai.
