Shillong, Risaw, 23: Ka Sorkar Jylla ha ka sngi Balang ka la rai ban pynjlan ïa ka rta rungkam na ka bynta ki nonghikai SSA haduh 45 snem kum ka jingplie ïa ka jingkhang ba kin dup lah ban aplai ïa ki kam nonghikai ha ki skul Sorkar naduh ka kyrdan Lower Primary haduh ka kyrdan higher secondary level.
Ïa kane ka rai la shim da ka Kynhun Mynri ba la pynïaid da u Myntri Rangbah ka Jylla u Conrad K. Sangma kaba la long ha Resubelpara, North Garo Hills District.
Haba kren sha ki lad pathai khubor, u Myntri ka tnat Pule Puthi ka Sorkar Jylla u Rakkam A. Sangma u la ong ba kito ki nonghikai kiba la shah thungkam hapoh ka SSA, yn sa ailad ïa ki ban ïashim bynta ha ka jingpynrungkam ha ki skul Sorkar haduh ka rta kaba 45 snem.
“Ka Kynhun Myntri ka la mynjur ïa ka jingtyrwa ban pynjlan ïa ka rta thungkam jong ki nonghikai SSA kiba la don ha ka kam ba kin dup lah ban aplai ïa ki kam ha ki skul Sorkar kata naduh ka kyrdan Lower Primary, Upper Primary, Secondary bad Higher Secondary Schools haduh ka rta kaba 45 snem nangne shakhmat,” ula ong.
Dang shen ka Meghalaya SSA Schools Association (MSSASA) ka la ai por ar bnai ïa ka Sorkar ban wanrah ïa ka polisi ban pynskhem noh ïa ka kam jong ki 13000 hajar tam ki nonghikai skul SSA ha baorh kawei ka jylla.
Ka Sorkar ka la kular ruh ban thaw da ka Formula ban thawlad ïa ka jingdawa jong ki nonghikai SSA.
