Shillong, Jylliew, 08: Ka Delimitation Committee ba la thung da ka Khasi Hills Autonomous District Council (KHADC) ha u bnai Risaw, 2023 khatduh iawai ka la aiti ia ka kaiphod ha u Deputy Chief Executive Member (Dy.CEM) u Bah Pynshngaiñ N. Syiem ha ka ophis treikam jong u ha ka Lah Sngi u Blei.
Ia ka kaiphod, la aiti da ka Delimitation Committee ba la khlieh da u Chairman u Bah Strawell Kharsyiemlieh uba dei u nongbishar ba la shongthait jong ka District Council Court ryngkat bad ka jingsakhi lang jong ki dkhot ka Committee.
U Bah Kharsyiemlieh ha ka jingiakren bad ki lad pathai khubor u la iathuh ba um pat lah ban iathuh bniah halor ka kaiphod ba la aiti sha ka Executive Committee. U la ong ba ka kamram jong ka Delimitation Committee ka long tang ban shu pyniaryngkat ia ka jingdon jong ki nongthep vote ha 29 tylli ki Constituency hynrei ym ban phiah satia ia ki Constituency.
Ka Delimitation Committee ka la pynlong ia ka jingpynsngew paidbah ha kyllleng ki jaka ha ki District jong ka rilum Khasi ban pan jingmut na ki paidbah bad na ki kynhun bapher bapher ha kaba iadei bad kane ka kam.
Na ka liang jong u Bah Pynshngaiñ u la iathuh ba ka Executive Committee kan sa iathir iatai shwa halor kane ka kaiphod ba la ioh pdiang bad lada ka Executive Committee ka la hun yn sa rah sa ha ka Dorbar Lyiur jong ka Ingdorbar Thawain ka Council ka ban sdang naduh ka 10 tarik Naitung, 2024.
