Shillong, Nailar, 31: Ki bor synshar jong ka East Jaiñtia Hills District lyngba ka Additional Deputy Commissioner (ADC) ka East Jaiñtia Hills District ka kong J.U.Kharpuri ryngkat ka jingsakhi lang jong u Pulit Ophisar uba peit ïa ka Umkiang Patrolling Post u R.Das ha ka step sngi Saitjaiñ ki la pynkut noh ïa ka metïap ba dang sah jong u nongïalam ka Awami League u Ishaque Ali Khan Panna sha Tamabil, ka khappud jong ka ri India bad Bangladesh na ka bynta ban aiti noh ïa ka met sha ki bor synshar bad sha ki bahaing hasem jong ka ri Bangladesh,.
Ïa ka met jong u Panna la pynkit na Khliehriat Civil Hospital hadien ba ladep ban leh ïa ka postmortem ha Khliehriat Civil Hospital.
Kum ban shu pynkynmaw hangne, Ïa ka met, ba la lap ha ka janmiet 26 tarik Nailar, 2024, la ithuh na ka passport jong ka ri Bangladesh kum u Ishaque Ali Khan Panna, u General Secretary barim jong ka Bangladesh Chhatra League (BCL) bad u dkhot ba hakhmat eh jong ka Awami League na Pirojpur District. Ïa ka met jong u, la buh ha ka jaka buh metïap ha Khliehriat Civil Hospital na ka bynta ka jingpynithuh bad ban pyndep shuh shuh ïa ki kyndon jong ka aiñ.
La ithuh ba u Panna u dei na ka ri Bangladesh hadien ba la ïoh ïa ka Passport na ka met jong u.
Ha ka sngi Thohdieng, u Symbud Myntri Rangbah uba khmih ïa ka tnat Kam Pohing ka Jylla u Bah Prestone Tynsong u la ïathuh ba ka Sorkar Jylla ka la pyntip sha ki bor ba halor bad sha ka High Commission jong ka ri Bangladesh bad India (halor ka jinglap ïa ka met jong u Panna).
U la pyntip ruh ba ka Sorkar Jylla ka la bthah ban leh ïa ka Forensic Test ban tip ïa ka daw tynrai kaei kaba la jia halor ka jingïap jong u Panna.
U Symbud Myntri Rangbah u la ïathuh ruh ba katkum ka jingtip ba la ïoh pdiang na ka tnat shipai BSF, kam don kano kano ka jingpyrshang jong u Panna ban jam shapoh u pud u sam ka ri India.
“Namarba na ka liang jong ka ri Bangladesh ki la kam ba u nongïalam ka Awami League u la pyrshang ban phet sha India bad katba u dang don ha lynti hynrei ki shipai BSF ki la pynshisha bad ong ba kam long kumta bynrei tang hadien 2-3 sngi ïa ka met jong u la lap ha hapoh kumba 1.2 ne 1.3 kilomitar shapoh u pud u sam jong ka ri India,” u la ong bad ïathuh ba kaiphod post mortem ka pynpaw ba u Panna u la shah pynïap.
“Dei namar kane ka daw, ka kamram jong ka Sorkar jylla ka long ba ngin hap ban pynlong shuh shuh ka jingtohkit bad kata ka dei ka jingleh ïa ka forensic test,” u la bynrap.
