Shillong, Jymmang 06: Ka sorkar jylla ka la kyrpad ïa ka AAI ba kan pynïaid ïa ka kad liengsuiñ kaba long lyngba ka Operations and Maintenance (O&M) na ka bynta ki liengsuiñ kiba lah ban shong kumba 20 ngut bad la kyntu ruh ba ka dei ban sdang noh ïa ka jingshim license na ka bynta ban pyntreikam ïa kane ka kad liengsuiñ jong ka Baljek Projek.
Ka jingpyntreikam ïa ka Operations and Maintenance (O&M) and Communications, Navigation & Surveillance/Air Traffic Management (CNS/ATM) ka dei lyngba ka jingmynjur jong ka AAI ban pyntreikam bad pynïaid ïa ki liengsuiñ ha ka Airport na ka bynta ki liengsuiñ kiba lah ban shong 20 ngut.
La ong ba ka jingthmu jong ka jylla ka long ban pynïar ïa ka jingdonkam ban pynbun ïa ki kad liengsuiñ kiba heh ha ka jylla ha kaba ka jylla ka thmu ban pynïar ïa ki jingtreikam jong ka kad liengsuiñ kaba dei ATR-72 type.
Na ka liang ka Airports Authority of India (AAI), ka la aiti ïa ka Detailed Project Reports (DPR) ba la dep ban pynkhreh ha ka snem 2010 bad 2017 kaba la pynlong ïa ka sorkar jylla ban shim ïa ka jaka kaba heh kumba 56.5 acre.
Ka sorkar jylla ka la kyrpad ïa ki bor pynïaid jong ka AAI ban pynïaid ïa kane ka kad liengsuiñ ha kaba ïadei bad baroh ki kam kiba ka donkam bad halor kane na ka liang jong ka AAI ka la pynpaw ïa ka jingmon ban shimti ban pynïaid ïa kane ka kad liengsuiñ da kaba kyrpad ruh ïa ka sorkar ban pynïoh ïa ka jaka kaba heh kumba 125 acre na ka bynta ka Phase-I ba kynthup ïa ka jaka ba la buh mynshwa kaba dei 56.5 acre, bad kumjuh ruh ka jaka kaba long 115 acre na ka bynta ka Phase-II ba la pynpaw ha u snem 2020.
