Shillong, Naitung, 10: Ka Sorkar Jylla ka la aiti hakhmat ka Iingbishar Meghalaya High Court ïa ka kaiphod tohkit halor ka jingkynnoh tih mawshun beaiñ ha rilum Jaiñtia da ka Amrit Cement Industries Limited (ACIL).
Ïa ka kaiphod tohkit la shim ha ka jingbishar ïa ka PIL ba la ujor da u Ranjit Chandra Goshwami ha ka sngi Palei.
Ha ka hukum, ka Division Bench ba la khlieh da u Chief Justice IP Mukerji bad u Justice W Diengdoh la aipor ïa u Muktiar jong u nongujor ban phah ïa ka Affidavit kum ka jubab halor ka kaiphod, bad kano kano ka jingpynshai halor kane ka Affidavit lah ban ai da ka Cement Industries Limited shwa ban shong bishar biang ha ka 24 tarik, Naitung.
Ïa ka PIL la ujor lyngba ka jingïoh jingtip na ka Right to Information Act, kaba pyni ba ka Amrit Cement Industries Limited kam don ïa ka Valid License ban tih ïa u mawshun.
Katkum ka jingpyntip, la kynnoh ba ka Kompeni ka la pyndonkam beaiñ ïa u mawshun hapoh ka karkhana jong ka na ka bynta ban pynmih ïa ka dewbilat.
Ïa ka PIL la pdiang ïa ka 19 tarik, Rymphang, 2025.
Ïa ka jingtohkit la leh da ka Sorkar Jylla katkum ka jingbthah jong ka Iingbishar ha ka 8 tarik, Jymmang.
