Shillong, Jymmang, 05: Ka samla Idawanplishisha Swer kaba la pas ïa ka kyrdan First Ten ha ka Top 10 jong ka result Higher Secondary School Leaving Certificate (HSLC) Arts Stream ba la pynbna da ka Meghalaya Board of School Education (MBOSE) ha ka Lah Sngi u Blei ka la pynpaw ba ka don ïa ka jingangnud ban ïakhun ïa ka eksamin UPSC ha ki snem ki ban sa wan ynda ka la pyndep ïa ka jingpule ha ka Master Degree.
Ha ka jingïakren bad ki lad pathai khubor ka samla Idawanplishisha kaba pule ha St. Edmunds Higher Secondary School, Shillong ka la ong ba ïa mynta ka angnud ban bteng ïa ka jingpule ha ka Degree Level bad ban shim ïa ka sobject Political Science kum ka Honours Subject.
“Watla nga don hapdeng ka jingshitom hynrei ngam shym la duh mynsiem namarba nga la khreh ïa ka kot ha ka jinglah lajong bad da ka jingïarap jong ki nonghikai bad i mei i pa,” ong ka samla Idawanplishisha.
Haba kylli, ka la ong, “ngam shym la poi pyrkhat satia ban poi ha ka kyrdan kaba nyngkong namarba nga don hapdeng ka jingshitom ha kito ki bnai baladep bad nga sngewkmen haduh katta katta ba u Blei um shym la iehnoh ïa nga wat hapdeng ka jingshitom.”
Ka Disha Chokani kaba long ka khynnah pule jong ka St. Anthonys Higher Secondary School, Shillong kaba la ïoh ia ka kyrdan kaba nyngkong eh ha ka Top Ten jong ka result HSSLC Commerce Stream ka la pynpaw ba ka jingpynkhreh na ka bynta ka eksamin ka la long naduh ba ka dang pule ia ka Class-XI bad ha kajuh ka por ka la ong ruh ba kam poi pyrkhat satia ba kan ïoh bat ia kane ka kyrdan kaba hakhliehduh.
Ka la ong ruh haba ka don jingeh ka ju phai sha ki nonghikai ban pan jingiarap bad ban pan jingpynshai ia kino kino ki jingartatien ha ki sobjek kiba kam sngewthuh bha.
Katba ha ka Science stream, u Saptarshi Bhattacharjee na Laban Bengalee Boys’ Higher Secondary School u la ioh rung ha ka kyrdan banyngkong da kaba ioh khur 483 mark.
