Shillong, Lber, 06: Ki samla pule jong ka North Eastern Hill University (NEHU) hapoh ka synjuk jong ka North Eastern Hill University Students’ Union (NEHUSU) bad ka Khasi Students Union (KSU) NEHU Unit ha ka sngi Palei ki la khang khyrdep ïa ka ophis treikam jong u Vice Chancellor u Prof P.S Shukla kum ka dak ban pyrshah ba un dang wan phai ban treikam biang hapoh ka skulbah.
Kane ka la jia hadien ba u Prof P.S Shukla dang shen u la kam ba un sa shimti biang ïa ka kam ha skulbah NEHU kum u Vice Chancellor ha ka 3 tarik mynta u bnai.
Ki samla pule kiba la sdang biang ïa ka jingïakhih ki la khang tala ruh ki san tylli ki khyrdop ka skulbah NEHU ban pynthikna ba u Prof Shukla um dei satia ban ïoh rung shapoh ka phyllaw jong ka skulbah NEHU.
U President jong ka NEHUSU samla Sandy Sohtun haba ïakren bad u nonglum khubor u la ong, “kumba ki samla pule ki la shah shitom bad shah jingit 16 sngi kynthih ha kito ki bnai jong u snem ba la leit sa mynta lei ban shu ap shi miet kam don jingeh eiei ban ap miet.”
“Katba ngim pat ïoh ïa ka kaiphod tohkit bad katba u Prof. Shukla um pat pyndem ngin ieng skhem beit ba ngin ym ailad ïa u (Prof. Shukla,” ong u samla Sohtun.
Haba kylli halor ka jingbym pynpaw pyrthei da ka Ministry of Education ka Sorkar India ïa ka kaiphod tohkit kaba la kynjoh mynta la saw bnai, u President ka NEHUSU u la ong, “kane ka jingïakhih jong ngi ka la ïaid la saw bnai hynrei na ka liang jong ka Ministry lane na ka Sorkar Jylla kam shym la don kano kano ka jingpyntip kumno ban leh ïa u Vice Chancellor hynrei la shu pynap ïa ngi.”
U la kynnoh ruh ba ka dei ka jingbym ai jubab eiei da ka Ministry of Education bad ka Sorkar Jylla haduh mynta ki samla pule ka NEHU ki sah umdum halor ka jingdawa.
Une u nongïalam ka NEHUSU u la kynthoh ruh ïa ka jingpynbna jong u Prof Shukla ban treikam nabar (Virtually ne Online Mode). “Ngin sa thoh ïa ka shithi na ka NEHUSU bad KSU NEHU Unit ba ngim pdiang satia ïa ka jingtreikam jong u VC lyngba ka Online Mode hynrei lada u wan leilei da ka met ngin ym ailad ba un wan iuhkjat ha kane ka skulbah,” u la bynrap.
U President ka NEHUSU u la kynthoh ruh ïa ka jingkren jong u Myntri Khynnah ka Sorkar Pdent uba khmih ïa ka Ministry of Education u Dr. Sukanta Majumdar da kaba ong, “u (Myntri ka Sorkar Pdeng) dei ban sngewthuh na ka liang jong ngi, ngi dawa halor ka nongrim bad la phah ruh ïa ka komiti tohkit ban wan sha kane ka skulbah ha kaba ngi la aiti ïa ki jingdonkam bad ki sakhi sabut pyrshah ïa u Prof. Shukla kiba u la leh ha kine ki lai snem kynthih hynrei balei pat haduh mynta ïa ka kaiphod tohkit haduh mynta (la jan saw bnai) ym shym la pyni ïa ka rai ba la shim.”
“Kumba ngi la kren naduh ka sngi nyngkong, daleilei ruh em ngin ym ailad bad ngi la thoh ïa ka shithi mynshi sngi ba ladei ban pyllait noh ïa ka kaiphod tohkit hynrei haduh mynta ngi sah umdum bad ki samla pule kim pat ïoh jingshai. Pynban ngi dang don ka jingshaniah ha ka Ministry ha kine ki sngi ba la leit bad ynda ngi la ïoh ïa ka jingleh donbor jong u Prof. Shukla kane ka pyni ba ka don ka jingïasylla hapdeng jong ki (Ministry of Education bad u Prof.Shukla) katba ïa ngi pat kim pynshai eiei ruh em,” la ong u President ka NEHUSU.
