Shillong, Nailur, 20: Ka Meghalaya Pradesh Congress Committee (MPCC) ha ka sngi Thohdieng ka la pyntip ba ka ladep ban pynkhreh ar tylli ki jingujor ne ki Petition pyrshah ïa ki arngut ki MLA ba la phet seng kiba dang don hapdeng ka jingshah sospon kata u MLA jong ka Nongstoiñ Constituency u Bah Gabriel Wahlang bad ïa u MLA jong ka Mawhati Constituency u Bah Charles Marngar bad kynthup sa kawei pat ka jingujor pyrshah ïa u MLA jong ka Umsning Constituency u Dr. Celestine Lyngdoh uba khlem shah sospon ha ka seng Congress.
Ha ka jingïakren bad ki lad pathai khubor u President jong ka Meghalaya Pradesh Congress Committee (MPCC) u Bah Vincent H. Pala u la ïathuh ba ka Party ka dang ap sa ïa ka rai jong u Lamphang ka Iingdorbar Thawain ka Jylla u Thomas A. Sangma ha kaba ïadei bad ka jingryngkoh jong ki lai ngut ki MLA ka seng Congress sha ka National Peoples Party (NPP) kaba bat ïa u lakam synshar hapoh kane ka jylla.
Shuh shuh u la ong ba lada ka Congress ka shem ba ka rai jong u Lamphang ka Ingdorbar Thawaiñ ka Jylla ka long kaba sngewïahap, na ka liang jong ka party kan shu sngap noh, hynrei lada ka party ka shem ba ka rai jong u Lamphang ka long ka bym sngew ïahap ka Congress kan ujor beit sha ka Ingbishar Meghalaya High Court pyrshah ïa ki lai ngut ki MLA phet seng.
“Katkum ka Rule, u Lamphang u dei ban ai rai hapoh ar taiew ne u hap ban pynkut ïa ka Case hapoh hynriew bnai. Ngi kyrmen ba u Lamphang un sa ai noh ïa ka rai,” ong u Bah Pala.
“Ngi la ïakren sani ruh ba katkum ka hok jong ki nongshong shnong, ki nongjied ki la duh thiah duh dem bad ka jingphet noh jong ki lai ngut ki MLA na ka Congress kam dei satia ka jingmyntoi ïa ki paidbah hynrei ka jingmyntoi jong ki katto katne shimet shimet,” ong shuh shuh u Bah Pala.
U la pyntip ruh ba ka jingpynkhreh ïa ka jingujor ka dei lyngba ka jingtip jong ka All India Congress Committee (AICC) bad ka Legal Team jong ka MPCC na kane ka Jylla Meghalaya.
“Ngi la ïakren ruh ha kaba ïadei bad ka jingweng noh ïa ka jingkyrshan ïa ka Executive Committee (EC) hapoh ka Khasi Hills Autonomous District Council,” ïathuh u Bah Pala bad bynrap.
“Ngim don jingïohnong eiei namarba ha Khasi Hills Autonomus District Council ngi don sa tang uwei u MDC bad ha Ingdorbar Thawain ka Jylla ngi don sa tang uwei u MLA,” u la ong.
