Shillong, Naitung, 05: Ka Dorbar Shnong Umkiang, ka sngewkhia halor ka jingbym shimkhia jong ka tnat MeECL ban pynïoh da u Transformer uba thymmai hapoh ka Dong Pahar Umkiang.
Ha ka jingshisha ki nongshong shnong hapoh kane ka Dong ki la shong dum khlem bording kumba ar bnai tam ei ei, kata naduh ka 20 tarik, Ïaiong, 2024, na ka daw ka jingsniew jong u Transformer uba don hapoh ka Dong Pahar Umkiang.
U Waheh Shnong Bah Lasting Pala, marmar u la pyntip sha ki bor ba dei peit, kata, sha ka ophis jong u SDO bad Engineer jong ka MeECL kaba don ha ka shnong Moowakhu, Khliehriat, East Jaintia Hills District, halor kane jingeh kaba kine ki nongshong Shnong ka Dong Pahar ki ïakynduh.
Na ka por sha ka por u Waheh Shnong u la ju pynkynmaw ïa ki ophisar shaphang kane ka jingjia ne ka jingduhnoh u Transformer, hynrei ka jubab ba la ïoh ka long ba ki ladep ban pyntip sha Shillong (Head Quarter), hynrei haduh mynta ym shym la ïoh ïa ka jubab na ka bynta ban ïoh ïa u Transformer bathymmai na ka bynta Dong Pahar Umkiang.
“Kane ka jingleh bym suitniew jong kane ka MeECL, ka la pynjynjar ïa ki nongshong shnong ban shong haba dum khlem jingshai wat lada dei ka hok ban ïoh jingshai bad ka long ruh kum ka jingiehbeiñ ïa ngi kiba sah sha kyndong ne ka thain khappud,” ong u Bah Pala.
“Sa shisien ngi kyrpad ïa ka MeECL ban ai noh da u Transformer uba thymmai khnang ba kan long ka jingmyntoi ïa ki nongshong shnong ne ki nongpyndonkam bording,” la ong u kyrwoh.
