Shillong, Jylliew, 13: Ka High Commission of India kaba don ha nongbah Dhaka, Bangladesh ka la pan jubab na u Deputy Commisioner jong ka East Khasi Hills u Sibhi Chakravarthy Sadhu ban pynshisha ïa ka jinglong nongshong shnong jong ka East Khasi Hills bad ïa ka jinglong nong India jong u Bah Onil Talang uba shong basah ha ka shnong Pyrdiwah kaba hap hapoh ka Raid Mukertilla, Pynursla Civil Sub Division uba la shah kem ha ki shipai Border Guard of Bangladesh (BGB) ha ka 8 tarik u Nohprah, 2021 katba u dang thmu ban leit sum ha Wah Umngot ha ka por shiteng sngi.
Une u rangbah haduh mynta u dang shah set ha along Sylhet District Jail ha ka ri Bangladesh mynta la jan ar snem shiteng.
Kane ka jingpan jubab da ka High Commission of India ka long ban shimkhia na ka bynta ban ïakren bad ki bor synshar jong ka ri Bangladesh khnang ban ïoh pyllait noh ïa u Bah Onil Talang, ba la antad ba u la don mynta la 56 snem ka rta, na ka along na Sylhet District Jail bad ban wan phai biang sha la ka jong ka ri bad sha la ki bahaiing hasem.
Ka jingshimkhia jong ka High Commission of India ka long hadien ba u Bah Joannes JTL Lamare uba long u nongtrei mon sngewbha na ka shnong Kynton-U-Mon, Nongkrem, East Khasi Hills District u la phah da ka jingthoh ha ka 23 tarik Jymmang, 2024 sha u Myntri ka tnat External Affairs ka Sorkar India u Dr. S. Jaishankar ba un tuklar lem halor kane ka jingshah kem khlem nongrim jong u Bah Onil Talang ha ki shipai ïada khappud jong ka ri Bangladesh.
