Shillong, Nailur, 27: Ka Mawkynrew Sohphlang Eco-Cultural Indigenous Society (MSECIS) ha ka sngi Thohdieng ka la pyntip ba kan sa pynlong biang ïa ka Sohphlang Festival kaba ar sngi ha ka 25 tarik bad 26 tarik, Risaw 2025 ha Lad-Kharang.
Ha kane ka Sohphlang Fetival, ban sa plie paidbah ha ka sngi sdang da ka Myntri ka rep ka riang ka Sorkar Jylla ka Dr. Mazel Ampareen Lyngdoh, ym tang ba la die ïa u Sohphlang hynrei yn sa die ruh ïa kiwei de ki marrep kum shi bynta ban ïarap ïa ki nongrep jong ka thaiñ Mawkynrew
Ha ka jingïakren bad ki lad pathai khubor, ki nongïalam jong ka MSECIS) ki la ïathuh ba ha u snem baladep ka jingpynlong ïa kane ka tamasa ka long kaba ïaid beit bad ki paidbah ruh ki la ai ïa ka jingkyrshan ban pynlong ïa kane ka tamasa kum shi bynta ban ïarap ïa ki nongrep trai jylla.
“Ngi la hap ban pynlong biang ïa kane ka tamasa namar ka jingkyrpad jong ki paidbah nongshong shnong ka thaiñ namarba kane ka tamasa ka la ïarap shikatdei eh ïa ki,” ong ki nongïalam ka MSECIS.
U Bah Carmel Lyngdoh uba dei u Adviser jong ka MSECIS u la ong ba ki paidbah haba ki wan thied ïa u Sohphlang kim donkam shuh ban song ha ki kot hynrei ladep ban song lypa ha ki jingsong ban pynsuk ïa ki nongthied.
Ki nongrep ha ka thaiñ Mawkynrew ki ïoh shibun ki jingmyntoi ha kaba ïadei bad ka jingpynlong ïa kane ka tamasa bad ka kynhun ka khot bad wer ïa baroh ki nong shong shnong hapoh ka jylla kiba rep ïa u Sohphlang ban ïashim bynta lang ha kane ka tamasa khnang ban kyntiew ïa u Sohphlang bad ïa ki nongrep jong ka thaiñ Mawkynrew.
