Shillong, Rymphang, 05: U Myntri ka Sorkar Jylla uba khmih ïa ka tnat Jngohkai Pyrthei Bah Paul Lyngdoh ha ka sngi Balang u la ong ba ka jingpynkynriah ïa ki nongdie madan kan dang kham shipor namar ka jingdon jong ka elekshon sha ki Autonomous District Councils (ADC) ha rilum Khasi bad bad ha rilum Jaintia.
Ha ka jingïakren bad ki lad pathai khubor u Bah Paul u la ong, “namar ka jingdon jong ka elekshon sha ki ar tylli ki Autonomous District Council, ki ophisar jong ngi ki don lut mynta ha ka kamram elekshon bad kumjuh ruh ki Myntri Sorkar bad u Symbud Myntri Rangbah uba khmih ïa ka tnat Pynroi Sor, kaba ka tnat treikam jong u, ka dei kaba hap shim jingkitkhlieh ïa kane ka kam ban pynkynriah ïa ki nongdie madan, dei na kata ka daw kan kham shim por khyndiat.”
“Kumba u la pyntip bad nga ruh nga la pyntip ïa phi mynshwa, ka jingpynkhreh ka dang ïaid shakhmat bad ngi la ïaid shakhmat ban ithuh ïa ki jaka ba thymmai na ka bynta kine ki nongdie madan da kaba sdang shwa nyngkong na Khyndai Lad,” la pyntip u Bah Paul.
Halor ka jingbuh jingkylli ki nongdie madan ïa rai ba la shim tang da ka “Provisional” Town Vending Committee ha kaba ïadei bad kane ka mat, u Bah Paul u la ong, “kumba nga ju kren, ka Association ka dei kaba la don bynta lang ha kane ka kam. Ngi la don borabor ka jingïasyllok bad ki mynta la jan shi snem, kam long kaba suk ban pynsngewbha lut ïa baroh bad na ka bynta jong ngi ka kamram kaba nyngkong tam ka long ban peit shwa ïa ka jingmyntoi jong ki nongshong shnong, ki nongpyndonkam ïa ki surok bad ki lynti ïaid kjat bad namarkata, ngi hap ban pynthikna shwa ïa ka jingmyntoi jong ki paidbah babun balang khnang ban ym ïatakhuh bad ka jingmyntoi jong kiwei pat ki kynhun ha ka imlang ka sahlang.”
Lada ka jingpynkynriah kan urlong naduh ka 7 tarik mynta u bnai, u Bah Paul u la ong, “ngi la batai shai ïa ka thong jong ngi bad ïa ki kamram ba ngin leh hynrei ki kam kiba bniah, ka tnat Pynroi Sor kaba dei ka tnat ba dei peit kan dei ka tnat kaba lah ban ai jubab kham bha halor kane ka kam.”
