Shillong, Rymphang, 14: U kyrtong jong ka Khun Hynñiewtrep National Awakening Movement Bah Shemstar Rynjah uba ïakhun na Laban-Mawprem Constituency ïa ka elekshon sha ka KHADC ha ka sngi Thohdieng u la pynbna ba un ym pynlong satia ïa ki jingïalang paidbah hapoh ka Constituency.
Haba kren sha ki lad pathai khubor, u Bah Rynjah u la ïathuh ba u la shim ïa kane ka rai ban pynsangeh lut ïa baroh ki jingïalang paidbah namar ka jingdon jong ka eksamin SSLC bad HSSLC ba la pynlong da ka MBoSE.
U Bah Rynjah u la ong ba lada pynlong ïa ki jingïalang paidbah kin pynthud ïa ki khynnah skul kiba dang pynkhreh ïa ki eksamin namarba ha ki jingïalang paidbah yn hap ban pyndonkam ïa ki tynghung jingpynsawa.
“Nga kwah ban pyntip sha ki paidbah jong ka Laban-Mawprem Constituency ba ngan ym pynlong satia ïa kino kino ki jingïalang paidbah namarba ki tynghung jingpynsawa kin pynthud ïa ki khynnah skul kiba pynkhreh ïa ki eksamin hapoh Constituency bad ha ka jylla baroh kawei,” ong u Bah Rynjah.
U Bah Rynjah u la ong ba u la shim ïa kane ka rai hadien ka jingïasyllok bad ki nongkyrshan kiba mynjur ïa kane ka rai namarba ma ki ruh ki don ïa kajuh ka jingkitkhlieh na ka bynta ka lawei jong ki khynnah skul kiba dang don hapdeng ka jingpynkhreh ïa ki eksamin bapher bapher.
“Lada nga jop, ngan wad lad ban ïarap ïa ki nongbylla sngi, ïa ki nongñiah kali kamai kum ki nongñiah taksi bad nongñiah bos, ban ïarap ïa ki nongdie madan, ban thawlad na ka bynta ban ïarap ïa ki nongrep lyngba ki skhim bapher bapher bad ban buddien ïa ka ishu khappud,” ula bynrap.
Une u kyrtong jong ka KHNAM u la ïathuh ruh ba un sa thoh sha ka Sorkar India ban aiti noh ïa ki jaka ba la bhah sha ki shipai kiba don hapoh ka Laban-Mawprem Constituency na ka bynta ban shna ïa ki shlem kiba ai jingmyntoi ïa ki paidbah jong ka Laban-Mawprem Constituency bad ban buddien ruh na ka Sorkar Pdeng ïa ka jingdawa ban pyntreikam ïa ka Inner Line Permit (ILP) ha Meghalaya.
“Tad haduh ba ka Sorkar Pdeng kan da ai jingmyntoi ïa ka jingdawa ban pyntreikam ïa ka ILP, ngi donkam ban pynkhlaiñ shwa ïa ki ain jong ki District Council ban tehlakam ïa ka jingwan rung kyrthep ki mynder bad ha kajuh ka por ngan buddien ruh ïa ka jingpynkynriah ïa ki briew kiba sah ha Them Iew Mawlong,” u la ong.
