Shillong, Risaw 18: Ka Meghalaya State Planning Board (MSPB) ha ka sngi Balang ka la bthah ïa ka tnad Kam Pohïing ka jylla, Transport, ïa ka tnad PWD bad ïa ka tnad Pynroi Sor ba kin ai jingmut bad ba kin thawlad ban weng ïa ka jingdheng kali kaba jur bha manla ka sngi ha sor Shillong.
U Chairman jong ka Board, Bah Metbah Lyngdoh ha ka jingkren bad ki lad pathai khubor hadien ba la wai ka jingïalang jong ka MSPB u la ong ki tnad bapher bapher jong ka Sorkar Jylla ki la ïatai sani bha ha kaba ïadei bad ka jingdheng kali kaba baroh ki paidbah ki mad jingeh manla ka sngi.
U la ong ruh ba ka bynta kaba kine ki tnad treikam kin ai jingmut ka long kumno ban wad ïa ki lad ki lynti khnang ban lait na ka jingdheng kali. U la bynrap ba ka State Planing Board kam shym la buh por ïa kine ki tnad treikam ba kin phah ïa ki jingai jingmut hynrei la shu bthah ïa ki saw tylli ki tnad treikam jong ka Sorkar ba kin leh pynstet kham kloi ia kane ka kam.
Ha kane ka jingïalang la rai ban khot ïa ka tnad Bording ban ai jingmut halor ka rukom pynpoi bording sha ki paidbah ka jylla.
U Bah Metbah u la ïathuh ruh ba ki tnad Sorkar kiba la poi sha kane ka jingïalang ki kynthup naduh ki ophisar sorkar ka tnad Kam Pohing, PWD, PHE, Transport, Urban Affairs, Agriculture, Power, Water Resources, ka tnat Soil, Fisheries nalor kiwei kiwei.
U la iathuh ba ka Board kan sa khot biang ïa ka jingïalang ban shong pyrkhat kam halor ki jingai jingmut na ki tnad bapher bapher khnang ba kin lah ban tip kumno ban pyntyllun shakhmat ïa kane ka jingthmu.
