Shillong, Lber, 27: Ka Sorkar Jylla ka la rai ban thaw da ka Task Force ka ban khmih ïa ka jingpynpoi syiar nabar ka jylla.
Ïa kane la pyntip da u Myntri ka Sorkar Jylla uba khmih ïa ka tnat Animal Husbandry & Veterinary u Bah AL Hek hadien ka jingïakynduh ïa ki nongïalam jong ka Meghalaya Poultry Farmers and Welfare Association (MPFWA) ha ka sngi Palei.
“Ka Sorkar kan sa thaw da ka Task Force (ban khmih ïa ka jingeh ba la mad da ki nongri syiar trai jylla),” la ong u Bah Hek haba kren sha ki lad pathai khubor.
“Kano kano ka jingeh kaba ki mad, ki dei ban pyntip sha kane ka Task Force,” u la bynrap.
U Bah Hek u la pyntip ïa ka kynhun ba haduh mynta kam pat don kano kano ka jingsaphriang ka jingpang khlam jong ki syiar bad ka jingjia ka dei kaba la kdew ïa kaba la jia ha ki snem 2019-2020 ha Haryana hynrei ym dang shen.
“Lada ka la jia dang shen, ka sorkar kan jin da la ïoh jingtip bad tnad kan nym sngap jar, ngin shimkhia ïa kum kine ki jingpang kiba jia shabar ka jylla Meghalaya,” u la ong.
Shwa kane, haba kren sha ki lad pathai khubor, u General Secretary ka seng u Bah William Diengdoh u la ïathuh ba ka kynhun ka la pynpaw ïa ka jingsngewkhia halor ka jingwan rung ki syiar nabar ka jylla khamtam na ki katto katne ki bynta, kiba la pynbna ba ki la kem pang (ha ka jingpang khlam).
Da kaba kdew ïa ka khubor na ki lad pathai khubor, u Bah Diengdoh u la ïathuh ba ka don kawei ka kali kaba la lap bad kaba kit ïa ki syiar kiba wan na Haryana, Punjab, kaba dei ruh ka jylla ba la pynbna ba ki syiar ki pang khlam bad kine ki syiar la lap ha ka por ba dang sdang bad ym shym la shah satia ban rung shapoh ka jylla.
“Ngi la wan sha ka sorkar jylla ban dawa ïa ka jingkhang shipor hynrei ngi sngewthuh ba ka jingkhang shipor ne kino kino kiwei pat ki kyndon ki lah ban ym treikam hynrei ka Sorkar ka la rai ban buh ïa ka kynhun treikam ban peit bniah ïa ki jingujor bad ban pynthikna ruh ba ki jingpeit bniah ki long katkum ki SOP, kaba katkum ka jingthmu jong ka Sorkar Pdeng ka la pyntip,” u la ong.
Haba kylli, u Bah Diengdoh u la ong kum ka kynhun ka sngewkmen ïa ka jingïakren ha ka jingïalang bad ka angnud ruh ba ki jingïakren kin treikam ruh sha madan.
“Ka Sorkar kan sa thaw noh mardor da ka Task Force bad katto katne na ki dkhot jong ngi kin sa long ki dkhot ha kane ka Task Force khnang ba ngin dup lah ban kdew ïa ki jingduna ha ki sngi ki ban sa wan bad ngi khmihlynti ba kano kano ka jingduna kaba mih nangta, ngin sa lah ban pynpaw bad ka Sorkar kan dup lah ban weng ïa ki jingeh,” u la bynrap shuh shuh.
