Jowai, Risaw 23 : Ki nongïalam ka seng Jaiñtia Student Union (JSU) Khliehriat Circle ki la ïoh lad ban ïakynduh ïa u Bah Paul Lyngdoh ryngkat ka jingdonlang u MLA ka thaiñ uwei na u myntri ka jylla ma Kyrmen Shylla.
Na ka liang ka seng lyngba ki nongïalam jong ka ki la ïa kynduh ïa u myntri ha ka sngi ba u leit plie ïa ka jingkieng ïaid kjat ha ka shnong Sahksaw bad na ka liang ka seng ki la ai da ka dorkhas sha u myntri u Bah Paul Lyngdoh kaba ki la ai jingmut sha ka sorkar ban ai bhah bad ai bynta lang ïa ka East Jaiñtia ban ïoh shna ïa ka ïing sah bad sumar (Rehabilitation Centre) ïa kiba kyrni dih droks namar ka District East Jaiñtia ka dei kawei na ki jaka ba kham kynrei kiba dih droks.
La pynsngew ba ka dei ruh ka District kaba jur ka jingrung jingmih u droks shapoh ka jylla bad ka seng ka la pynsngew ba ka East Jaiñtia ka dei hok ban ïoh ïa kane ka shlem ai jingsumar ïa kiba kyrni droks khamtam ïa ki khun samla ka thaiñ ba kin lait na une u jingdih pynbuaid uba ïalam bakla ha ka jingim jong ki.
Na liang u Myntri ka Sorkar uba peit ïa ka tnat Social Welfare u la shim khia ïa kane ka jingai jingmut ka seng bad u la bthah ïa ki bor peit bor khmih ban wad jaka kaba biang paka ban ïoh buh kum kane ka shlem hapoh ka thaiñ, pynkut ka kyrwoh..
