Shillong, Naitung, 23: Ka Federation of Khasi Jaiñtia and Garo People (FKJGP) Central Body hadien ba la ïohi ïa ka jingshimkhia jong ka Sorkar Assam ban kyndang naphang ïa ki suba mynder ha kylleng ki jaka ban pynher krad shisyndon ïa ki sha ka jaka ba ki wan, ka la pynsngewkhia jingmut shi katdei eh ïa ka seng ïoh lehse ki mynder kiba la shah kyndang na ka jylla Assam kin wan rieh tngen pynban sha ka Jylla Meghalaya namar kadei ka jylla kaba ïatyngkhuh bad kiba bun ki khappud la ka long ha Ri-Bhoi District, West Khasi Hills, Jaiñtia Hills bad Garo Hills ruh kumjuh.
“Ka jingbym don satia ïa ki aiñ kiba khlaiñ ban ïada na ka jingwan rung kyrthep jong ki mynder kan buh ïa ka jaitbynriew bad ïa ka jylla hi baroh kawei ha ka jingma kaba khraw,” ong u kyrwoh ba la phah da u Vice President ka FKJGP u samla Kitboklang Nongphlang.
“Ka jing bym shimkhia jong ka Sorkar Meghalaya ban pyntreikam pura ïa ki aiñ kiba la don lypa kum ka Inter-State Migrant Workmen (Regulation of Employment and Conditions of Service) Act, 1979 (Work Permit) ka dei ka aiñ kaba ladep ban pyntreikam naduh ka 28 tarik, Naitung 2011, ka Meghalaya Residents Safety & Security Act 2016 bad kumjuh ruh ïa ka Meghalaya Identification, Registration (safety & Security) of Migrant Workers Act 2020, ka pynpaw shaikdar ba ka Sorkar Jylla kam don mon satia ban ïada ïa ka jaitbynriew bad ki la kheiñ dewthala ïa kata ka khet ba ki bat ïa u lakam synshar bad kata ka sur ba la mynjur ha Assemby ha u bnai Nohprah 2019 ban kyntu ïa ka Sorkar Pdeng ban pyntreikam ïa ka Inner Line Permit (ILP) ka dei tang ka jing pynthame ïa ki kynhun sengbhalang bad ïa ki paidbah nongshong shnong jong ka jylla baroh kawei namar ka jingleh drama jong ka Sorkar MDA ba la lamkhmat da ka NPP mynta la ar samoi ka la paw pyrthei hadien jong ka jingkren jong uwei na ki Myntri Khynnah ka Sorkar Pdeng uba bat ïa ka tnad Cooperation u Krishan Pal Gurjar uba dang shu wan shen sha ka Jylla Meghalaya dang ha kine ki khyndiat sngi ha kaba u la pynpaw ba um don jingtip eiei ruh em ïa ka jingkwah ban pyntreikam ïa ka Inner Line Permit (ILP) ha ka jylla Meghalaya,” la ong u kyrwoh na ka seng.
“Ka jingpyrshang ban shu tap eit miaw da ka Sorkar Jylla ha ka kyrteng ban shna Aiñ thymmai bad kumjuh ruh ban pynthame ba yn wanrah ïa ka jingpynbeit thymmai ïa ka MRSSA 2016, ka dei tang ka buit arsap suda,”la kynthoh ka seng.
“Ka FKJGP ka sngew ba wat ka Jylla Nagaland kaba la don lypa ïa ka Inner Line Permit (ILP) ruh ka dang sheptieng ïoh ba lehse kita ki mynder kiba la shah beh krad na ka jylla Assam kin poi pynban sha ka Jylla Nagaland tad haduh ba ka sorkar Nagaland ka la pynmih syndon da ka Notification ha ka 21 tarik, Naitung, 2025 ban bthah ïa baroh ki Deputy Commissioner jong ki District bapher bapher ban long kiba peitngor bad ban pyrkhing shuh shuh ïa ka jingwan jong ki briew kiba nabar, sa katno tam lei lei ïa ka jylla Meghalaya ha kaba ka Sorkar kaba ïalam ïa ka jylla ka dang ïohthiah lyngngai bad ki bym don jing kitkhlieh satia ïa ka lawei jong ka Jylla bad kaba shu bunkam pynban tang ha ki kam tamasa,” la kynthoh shuh shuh ka Seng
Ka FKJGP ka sngew ba lada ka sorkar ka dang ïai pyrshang ban ïalam bakla ïa ki paidbah tang namar ka jingkwah ban ailad bad ban ïada ïa ki mynder kiba wan rung kyrthep sha kane ka jylla ka jong ngi na ka bynta ka jingmyntoi ha ka saiñ pyrthei ban pynlong Vote Bank da ki mynder na ka bynta ban skhem ka shuki lajong, khlem pep kan sa poi ka ïa ba ka ding kan sa klang bad ha kata ka por ka sorkar kam dei ban tei pop ïa ki kynhun sengbhalang, la maham ka seng.
Haba buh jingkylli ïa ka jinglait rynghang ki khyrdop talasi mynder, ka FKJGP ka la buh jingkylli da kaba ong, “hato kita ki Infiltration Check Gate kin shu long tang ki khyrdop lum khajna jongno re jongno bad kita ki Labour Inspectors ba la thung ha manla ki Block kin shu pynsyrwa kai ïa ka pisa jong ka sorkar da kaba shu shim tulop ei khlem da treikam satia. Ka Sorkar jylla ka ladei ban shimkhia mardor bad kam dei satia ban dang kheiñ sting halor katei ka bynta bad lada ka sorkar jylla kam pyni satia kino kino ki dak ki shin na ka liang jong ka FKJGP kan sa leh la ka jong ka bynta,” la byrngem ka seng.
“Ka FKJGP ka bthah ïa baroh ki shnat treikam jong ka seng kiba don ha ka jylla hi baroh kawei ba ki dei ban long kiba peitngor bad ban bteng biang ïa ka jing khynra mynder khnang ba kan long ka jingïada ïa ka jaitbynriew na ka jingshah tyllep bad na ka bynta ka jing shngaiñ ki pateng ki ban sa wan,” la ong shuh shuh u kyrwoh.
