Shillong, Naitung, 23: Ka Sorkar Meghalaya ka la pynmih ïa ka jingbthah sha baroh ki Deputy Commissioner ba ki dei ban peitngor bha bad ban shim ïa ki lad ki lynti ban khanglad na ka jingwan rung jong ki briew kiba la shah kyndang na ka jylla Assam.
Kane ka sienjam ka long kum ka jubab halor ka jingshah kyndang kaba dang ïaid shakhmat pyrshah ïa ki briew kiba rung be-aiñ ha ka jylla Assam, kaba lah ban wanrah ïa ka jingktah kaba jur bha sha ka jylla Meghalaya.
Ka hukum ba la pynmih da u Additional Chief Secretary in-charge ka tnat Home (Political) Shakil P Ahammed ha ka sngi Balang ka la ong, “namar ka jingïaid shakhmat jingkyndang ïa ki nongbuhai shnong be-aiñ kaba dang ïaid shakhmat kaba la leh da ka Sorkar Assam bad ban khanglad ïa ka jingwan tuid jong ki briew kiba la shah kyndang sha kane ka jylla kaba lah ban pynmih ïa kano kano ka jingeh, namarkata la pynmih ïa ka jingpynbna kaba la bthah ïa baroh ki Deputy Commissioner ban shim ïa ki lad ki lynti bad ban long kiba peitngor ban khanglad ïa ka jingwan rung jong ki briew kiba nabar khnang ban pynneh ïa ka shongsuk shongsaiñ.”
Ka Sorkar Assam ka la kyndang naphang ïa ki briew kiba rung beaiñ kaba lah ban lam sha jingwan rung beaiñ sha ka jylla Meghalaya.
Ha kaba ïadei bad kane ka jinglong jingman, ka Sorkar Meghalaya ka la shim ïa ki lad ki lynti kiba tyngeh ban pynthikna ïa ka jingshngaiñ bad ka shongsuk jong ka jylla.
