Shillong, Nailur, 09: U Myntri ka tnat Social Welfare ka Sorkar Jylla u Bah Paul Lyngdoh ha ka Lah Sngi u Blei u la ong ba ka jingshim rai jong ka Sorkar Jylla ban thung ïa ka MP barim jong ka Tura ka Agatha K. Sangma kum ka Chairperson ba thymmai jong ka Meghalaya State Commission for Protection of Child Rights (MSCPCR) ka long hadien ba ka bishar bniah bha.
Ha ka jingïakren bad ki lad pathai khubor, u Bah Paul u la ong ba ki jingkynnoh kin ïai don beit wat lada ka Sorkar ka thung da kiwei ki briew ruh.
U la ong ba ka jingshisha ka long ba ka Sorkar ka ladep tyrwa bad ban ithuh ïa ki riewshimet ban shimti ïa ka shuki Chairperson jong ka MSCPCR hynrei kiba la shah tyrwa ki la kyntait noh mardor bad ka la kham shim por ïa ka Sorkar ban pyndep ïa ka jingthung kam.
Namarkata, la ai jingmut ïa ka kyrteng jong ka MP barim jong ka Tura ka Agatha K Sangma la phah sha ka Kynhun Myntri.
“Kane ka long hadien ba la tih bniah halor kane ka kam haba pyrkhat ïa ka jingshemphang jong ka (Agatha) ha Parliament, ka kyrdan jong ka bad kumjuh ruh nalor ba ka dei ka briew kaba la slem bha ha ka kam shakri paidbah. Kumta kita ki dei ki mat ba kongsan jong ka…,” la ong u Bah Paul.
