Shillong, Naitung, 28: Ka Village Defence Primary Committee Nongstoiñ Area ka la shim ïa ka sienjam ban ïakhun tyngeh na ka bynta rat dyngkhong ïa ki kam sniew bad ïa ki kam beaiñ hapoh ka Ïew Nongstoiñ bad hapoh ka sor Nongstoiñ baroh kawei.
Kane ka kynhun kaba la shah pynkhamti ïa ka bor lyngba ka tnad Pulit, u Syiem ka Hima Nongstoiñ, ka tnad Excise, bad u Deputy Commissioner, ka la shim ïa ka sienjam ban ïakhun pyrshah ïa ki kam sniew bad kam be-aiñ khamtam eh hapoh ka ïew Nongstoiñ kaba la bna kum ka ktem jong ki nongdih bad nongkhaïi drok.
U President ka VDP u Bah Markordor Kharsyiemlieh u la ïathuh ba ka Ïew Nongstoiñ mynshwa ka la kylla long ka ktem jong ki kam sniew khamtam eh ka jingdon jong ki nongdih bad ki nongkhaïi drok kaba la wanrah ïa ka jingtieng bad ïa ka jingbym shngaiñ shuh ïa ki trai dukan bad ïa ki nongleit iew leit hat khamtam ha ka por janmiet hynrei da ka jingshimkhia jong ka VDP mynta suki suki ka ïew ka la sdang sakhi biang ka jingshngaiñ jong ki nongleit nongwan.
