Shillong, Nailur, 12: Hadien ka jingryngkang dieng kper jong ki arngut ki MLA ka seng Congress na Ribhoi District sha ka National Peoples Party dang shen, ka Ri Bhoi District Congress Committee (RBDCC) ka la sei bujli da kiwei pat ki nongïalam bathymmai jong ka party ki ban ïalam hapoh ka them Ribhoi.
Kum ban shu pynkynmaw hangne ba u MLA jong ka Mawhati u Bah Charles Marngar uba dei ruh u President jong ka Congress ha Ri Bhoi ryngkat u MLA ka Congress na Umsning u Dr. Celestine Lyngdoh uba long ruh u President barim jong ka Meghalaya Pradesh Congress Committee dang shen ki la leit ban pynïasoh sha ka NPP.
Ryngkat bad kine ki arngut, u MLA ka Congress na Nongstoiñ u Bah Gabriel Wahlang ruh u la leit lang ban pynïasoh sha ka NPP.
Da ka jingleit pynïasoh jong kine ki lai ngut ki MLA sha ka NPP, ka Congress mynta ka don sa tang arngut ki nongmihkhmat paidbah, kata, u MLA na Mylliem Constituency u Bah Ronnie V. Lyngdoh uba sa sah marwei ha ka Iingdorbar Thawaiñ kaba don 60 ngut ki dkhot bad uwei u MP na Tura Parliamentary Constituency u Saleng A.Sangma.
Ki nongïalam kiba thymmai jong ka Congress ha Ri Bhoi ki kynthup ïa u President Bah M.G Kharshanlor, u Working President Bah G..S. Shadap, Senior Adviser Bah Standliwiss Rymbai, Adviser Bah Adrian Chyne Mylliemngap, Vice Presidents Bah Rocky Marwein, Bah Phrang Syngkli, Rev. P.W. Pnar, Bah Shalwist Mallai, u General Secretary Bah Defender S. Lamare bad kiwei kiwei ki nongialam ba hakhmat jong ka party.
