Shillong, Lber, 17: Ka KSU Mawshbuit Unit ha ryngkat ka KSU Nongthymmai Circle ki la ai ka jingkyrshan ba pura īa ka Dorbar Shnong Mawshbuit ba la lamkhmat da u Rangbah Shnong ban pyrshah īa ka jingkren jong u Symbud Myntri Rangbah ka jylla uba khmih īa ka tnat Kam Pohīng Bah Prestone Tynsong uba ong ba 600 mitar ka surok na Them Basuk sha Mawshbuit ka hap ha ka jaka ki shipai Gorkha Training Centre (GTC).
U Bah Prestone u la pynpaw īa kane haba jubab īa ka jingkylli ba la wanrah da u MLA ka Mawryngkneng Constituency Bah Heavingstone Kharpran ha ka Dorbar Mang Tyngka ka īngdorbah Thawain̈ ka Jylla kaba dang shu kut dang shen.
Ha u kyrwoh ba la phah sha ki lad pathai khubor ha ka Lah Sngi U Blei ka KSU ka la ong ba kan ai īa ka kti kamon ka kti kadiang īa ka Dorbar shnong bad kan īai don ha syndah ban īa pynbeit īa kane ka kam kaba la pyndik īa ki paid nongshong shnong jong ka shnong Mawshbuit bad ki para ri kiba ju īaid lynti sha ka shnong Mawshbuit.
Ka KSU ka la ong shuh shuh ba kan ap īa ka rai jong ka Dorbar shnong ban īaid shakhmat halor kane ka phang.
Katba rai ka shnong ka KSU ka la long kaba la khreh la ka long ha miej īakren ne ha madan ban īakhun, la bynrap u kyrwoh na ka KSU.
