Shillong, Jymmang, 12: Ka Meghalaya State Pollution Control Board (MSPCB) ka la phah khang khyrdep ïa ka M/s Shree Shakambari Ferro Alloys Pvt Ltd, Rwiang, Seinduli ha West Khasi Hills District na ka daw ka jingpynkheiñ ïa ki kyndon.
Ïa kane ka rai la shim da kaba pynshong nongrim na ka jingshem jong ka jingjurip da ki ophisar jong ka Board ha u bnai Kyllalyngkot, mynta u snem.
Ha ka shithi ba la pynmih dang shen, u Chairman jong ka MSPCB u R. Nainamalai u la ong, “Mynta, namarkata, ha kaba pyndonkam ïa ka bor ba la pynkup da ka Section 33(A) jong ka Water (Prevention and Control of Pollution) Act, 1974 bad ka Section 31 (A) jong ka Air (Prevention & Control of Pollution) Act 1981, la hukum ïa ka M/s Shree Shakambari Ferro Alloys Pvt Ltd. ba kan bud ryntih bad baroh ki kyndon bad ki jingpynbeit ba la buh ha ka Renewal of Consent to Operate bad ban aiti ïa ka kaiphod kaba bniah jong ka jingbud ryntih sha ka Board bad ban khang noh mardor ïa ka Unit tad haduh ban da pynmih da kiwei pat ki hukum.”
“Lada ym lah ban kohnguh ïa ka jingbthah, ka Board kan sa leh tyngeh da ka lynti jong ka aiñ pyrshah ïa ka Unit kumba la aibor hapoh ka kyndon jong ka Air (Prevention & Control of Pollution) Act 1981 bad Water (Prevention and Control of Pollution) Act 1974,” u la maham.
Ka shithi ka ong ba ïa ka jingjurip la leh da ki ophisar jong ka Board ha ka 30 tarik bad 31 tarik, Kyllalyngkot.
La lap da ki ophisar ha shwa ban rung shapoh ka karkhana, la ïohi na surok ba ka don ka jingmih ka tdem kaba jur bha na ka karkhana. Ka bynta jong ka tdem kaba mih na ka pajwa ka dei kaba la pynmih na u Cooling Tower ka dei kaba long um hynrei kham bun ka dei ka tdem kaba mih bad ka pyni ba ka don ka jingmih bym shym la tehlakam ïa ka jingmih ka tdem na ka pajwa.
Haba rung ha ka karkhana ha ka por 11.32 baje mynstep ha ka (30 tarik, Kyllalyngkot), la lap ba u Pollution Control Board (PCD) la pyntip noh bad kumta ka jingmih ka tdem jaboh ka jur bha napoh ka karkhana. Kam don satia ka jingsawa kaba mih na u PCD bad kane ka pynpaw ba la pynlip noh ïa u.
La ïohi ruh ba ka don ka tdem kaba mih na ka jaka pynmih bording ne Captive Power Plant (CPP), hynrei haba peit ïa ka Online Continuous Emission Monitoring System (OCEMS) kam shym la lah ban pynïasoh bad u tiar ba la buh ne ka lah ban long ba ka OCEMS ka la shah pynsniew ne ka don ka jingthut. Haba pynmeh ïa u PCD ka jingmih jong ka tdem ka hiar bha.
“Ha ka jingjurip ha ka por shiteng synnia ka pyni ba ka Unit ka pyntreikam ïa ka karkhana ha ka rukom kaba shyrkhei ha ka por mynmiet khlem da pynmeh ïa u PCD bad ka jingmih ka tdem kaba bun/kaba heh bha na ka unit ruh bad kane ka ka pyni ba ka jingduna jong ki briew ban pynïaid ïa ki tiar ban tehlakam ïa ka jingjaboh ha ka por miet,” la ong u Nainamalai.
U la pyntip ba ha ka step jong ka 31 tarik, Kyllalyngkot, 2025 la pynlong biang ïa ka jingjurip ha ka por 11.41 baje mynstep mar ïapoi ha katei ka karkhana, la jurip nyngkong ïa ki PDC bad la lap ba ki dang pynlip.
Shuh shuh, la lap khyndiat u dewiong bad u rnga ba la lum thup shabar ka sem bad ïa ka madan ym shym la siang dewbilat bha bad kane ka pynmih ïa u pumpum haba beh ka lyer. La lap ba ïa ka nala pyntuid um ym shym la siang dewbilat.
Ka Unit kam shym la lah ban pynpoi ïa ki jingtip na ka OCEMS naduh ka 28 tarik, Lber 2024 tad haduh kine ki sngi, u la bynrap.
 | ReplyForwardAdd reaction |
