Shillong, K’lyngkot, 28: Ka Iingbishar Meghalaya High Court ha ka sngi Baar ka la phah da ka notis sha ki san ngut ki dkhot ka Management jong ka Don Bosco Technical School, Shillong halor ka jingkheiñ dewthala da kaba pynpra ïa ka iing skul shwa ban bishar da ka Iingbishar.
Ha ka jingpynmih ïa ka hukum hadien ba la shong bishar ïa ka PIL halor kane ka mat, ka Bench kaba kynthup ïa u Chief Justice IP Mukerji bad u Justice W. Diengdoh ka la ong, “katkum kane, shwa ban bishar ïa kiwei pat ki mat ha kane ka kam, ngi phah ïa ka notis hapoh ka Contempt of Courts (High Court of Meghalaya) Rules, 2013 sha ki dkhot ka Management jong ka Don Bosco Technical School Shillong kata, (i) Sagi Stephen Parappilly (ii) Arcadius Puweiñ (iii) Edmund Gomes (iv) Dianetius Fernandez bad (v) Cyril Tirkey jong ka Don Bosco Technical School Shillong, Shillong -793003, East Khasi Hills District, Meghalaya, da kaba phai dien biang ha ka 24 tarik u Naiwieng, 2025 ban pan jubab ba balei kim dei ban shah pynshitom namar ka jingkheiñ dewthala ïa kane ka Iingbishar da kaba don lang ha ka sngi bishar banyngkong eh jong ka Iingbishar.”
“Khnang ban ïada na kano kano ka jingpyrshang ban pynkheiñ aiñ bad kum ka hukum ba shipor, ngi bthah ba ym dei ban leh ïa kano kano ka kam kaba ïadei bad ka jingpynpra, jingtei ne jingpynkylla ïa ka jingtei kaba la don lypa jong ka skul ba la kdew tad haduh ban da pynmih ïa ki hukum da kane ka Iingbishar. Ki bor pulit ki dei ban pynthikna ba dei ban bud ryntih ïa kane ka hukum,” la bynrap ka hukum.
Ka Bench ka la ñiew ba ka jingshim rai da ki bor pynïaid jong ka St Anthony’s Lower Primary School ka long kum ka jingleh kaba pyrshah wat hadien ba la pynmih ïa ka hukum ha ka 9 tarik, Nohprah, 2024.
“Ngi la hap ban shimkhia bha ïa kane ka kam. Watla ym shym la don kano kano ka hukum kaba khanglad ban pynpra ïa ka iing, kane ka jingleh ka long ka jingpynibor pyrshah ïa ka bor jong ka Iingbishar bad ka jingtular ïa ka bor bishar, ka long kum ka jingkheiñ dewthala. Ngi shim ïa ka kum kawei ka kam ba hakhmat eh jong ka Iingbishar,” la bynrap ka hukum.
Ïa ka Public Interest Litigation (PIL) ba la ujor da u Bah Raphael Warjri la shong bishar halor ka jingkynnoh ba ka skul kaba rim da ka iing dieng ba la shna pynwandur bha ka don ïa ka dor jong ka histori bad ka dei kaba biang eh ban pynbna noh kum ka “heritage building.”
“Watla katta, ka Management jong ka school ka la ïaid shakhmat ban pynpra ïa ka skul. Ban khanglad ïa kino kino kiba donkti lang ha kane ka jingmudui, ngi la bthah ban phah ïa ka notis jong ka aplikeshon sha ki bor pynïaid skul khnang ban sngap ïa ki ryngkat bad u nongmudui bad ka jylla ba shah mudui halor ka mat hato ka jingtei ka dei ban pynsah jingkynmaw bad ba dang dei ban pynneh pynsah ïa ka, da kaba pynsangeh ïa ka pynpra bad pynthymmai,” la ong ka ïingbishar haba bynrap “da ka hukum kaba ngi la pynmih ha ka 9 tarik, Nohprah, 2024, ngi la bthah ïa ka Jylla ban sorjamin bad ban pynlong ïa ka jingtohkit katkum ka aiñ hapoh ka Meghalaya Heritage Act, 2012 bad ban ai jingtip sha kane ka Iingbishar halor ka dor jong kane ka jingtei.”
Ka hukum ka la bynrap ruh, “namarba ym shym la mihkhmat ïa ka skul, ngi la pyrkhat ba kam long kaba dei ban pynmih ïa ka kano kano ka hukum kaba ktah ïa ka, ha ka jingbymdon jong kiba mihkhmat. Kumta, ngim shym la pynmih ïa ka hukum kaba pura kaba khanglad ïa ka jingpynpra. La khmih lynti na ka skul ba ynda ka la ïoh pdiang ïa ka hukum, ki dei ban wan mih hakhmat ka Iingbishar bad la bthah ruh ïa ka Jylla ban pynlong ïa ka jingtohkit halor ka jinglong jong ka iing skul, bad ym ïaid shakhmat ban dang bteng ïa ka jingpynpra ïa ka iing skul.”
Ïa ka kaiphod la aiti da u AAG K. Khan ban pyntip ba ïa ka jingsorjamin bad ka jingtohkit ladep leh ha ka 16 tarik, Nohprah, 2024 hapoh ki kyndon jong ka aiñ.
“Ka bynta kaba kham kongsan jong ka kaiphod ka long ba kane ka skul ka phai khmat sha ka Don Bosco Square ba ieng u durmot jong u Don Bosco. Ka phai sha ka bynta ba shakhmat jong ka skul. Ka Don Bosco Square ka dei ka jaka ba kongsan bad ka jaka ba pawnam bha ha nongbah Shillong. Shuh shuh, katkum ka kaiphod, ka jingtei kaba kum kata ym shym pynbna kum ka iing sah kynmnaw,” ong ka Bench.
“Hynrei, haba peit lang ïa ka dur jong ka Square, ïa u durmot jong u Don Bosco bad ka dur khmat jong ka skul kaba phai sha ka, ka jingai jingmut jong u Joint Director bad u dkhot jong ka Meghalaya Heritage Sub -Committee Urban Affairs, Meghalaya ka long ba ka jingtei ka dei ban buh ha ka thup kum ka ‘Heritage Building’ hapoh ka Aiñ. U la ai jingmut ba da kaba shim katkum ka jingsngew jong u ka Jylla ka dei ban pynmih ïa ki jingbthah kiba donkam ha kaba ïadei bad ka “jingtei” ne “jingpynkylla” kaba ïadei bad ka iing. Namarkata, ka paw shynna ba ha ka 16 tarik, Nohprah 2024 ka ïing ka dang ïeng kynshreng,” la ong ka Hukum.
