Shillong, Naiwieng 03: Ki nongïalam ba hakhmat jong ka Voice of the People Party (VPP) ha ka sngi Thohdieng ki la leit ban ïa kynduh ïa u Director jong ka North Eastern Indira Gandhi Regional Institute of Health and Medical Sciences (NEIGRIHMS) ha kaba ïadei bad ka rai ban pynlyngkot ïa ka rta thepkam na ka 35 sha ka 30 snem ha ka kam Nursing Officer ba kane ka shlem ai jingsumar ha ka Advertisement ka la pynbna paidbah ha u bnai ba ladep.
Ha ka jingïakren bad ki lad pathai khubor u General Secretary ka VPP, u Dr AJ Synkon ula ong ba ka jingïakynduh ïa u Director ka long beit ban wad ki daw ba la pynlyngkot ïa ka rta thep kam Nursing Officer.
U la ïathuh, hadien ba ladep ban ïakren bad u Director u la pynpaw ba ka daw jong ka jingpynlyngkot ïa kane ka rta thepkam kam dei ka jingleh jong ka NEIGRIHMS hynrei ka dei beit ka hukum ba ka Sorkar Pdeng lyngba ka Ministry of Health and Family Welfare.
U la ong ba hadien ba ka party ka la sngewthuh shai ba kane ka hukum ka dei kaba pynmih da ka Sorkar Pdeng na ka liang ka Party kan sa buddien ïa kane ka kam namarba kane ka rai kan ktah shibun ïa ki samla Khasi bad ki samla riewlum ha kylleng ka ri.
U la ong ba ka party kan sa leit ban pynsngew sha ki tyndong skhor ka sorkar jylla ha kaba ïadei bad kane ka kam namarba donkam kum ka jylla ban pynmih ïa ka sur kaba tang kawei, kata, ba ka rta thepkam ka dei ban neh beit 35 kumba la ju ïaid baroh shikatta.
