Shillong, Risaw 28: Ka Meghalaya High Court ka la pan ka jubab na ka sorkar pdeng bad na ka sorkar jylla ha kaba ïadei bad ka jingmad jingeh jong ki paidbah ïa ka jingshah pynthut ka leit ka wan na ka jingpynlong ïa ki jingïakob khwai dohkha.
Ka division bench kaba kynthup ïa u Chief Justice Soumen Sen bad u Justice W Diengdoh ka la pynmih ïa kane hukum hadien ba la shong bishar ïa ka Public Interest Litigation (PIL) ba la ujor da u Bah Joannes JTL Lamare.
Ka Ïingkashari ka la aipor lai taïew ïa ka Sorkar ban jubab ïa kane ka PIL.
“Ngi la sngap ïa ka jingpynsngew jong u Advocate General na ka bynta ka sorkar jylla bad kumjuh na ka DSGI ban jubab na ka liang ka sorkar pdeng. Ngi la bthah ïa ki nongjubab ba kin phah ïa ki jubab jong ki ha ka dur ka affidavit ha kaba ïadei bad ki sienjam ba la shim bad ïa kane kin hap jubab hapoh ki 3 taïew,” ong ka bench ka hukum ba la pynmih ha ka 27 tarik mynta u bnai.
Ka Ïingbishar ka la buh sngi ban shong bishar biang ïa kane ka kam ha ka 25 tarik, Naiwieng, 2025.
