Shillong, Risaw, 20: Ka Ophis jong u Sirdar bad Executive Dorbar Shnat Hima Nongwah Mawtamur, Sohiong Lyngdohship ka la mih shakhmat ban pynshai halor ka jingpynsaphriang ïa kawei ka voice recording ba la kynnoh ba ka don ka jingdie ïa ka jaka sha ki shipai BSF da ka shnat Hima Nongwah Mawtamur.
Ha u kyrwoh ba la phah sha ki lad pathai khubor, u Sirdar shnat Hima Nongwah Mawtamur Bah Estan Sing Jana u la ong, “ïa ka voice recording ba la pynphriang da ki katto katne lyngba ki Youtube Channel bad kiwei kiwei kiwei la ïohsngew naduh u snem 2022 hynrei ngi la sngap la ka sngap haduh mynta bad ngim shym la kwah ban ong eiei halor katei, ngi trei beit la ka jong ka kam, namar ha ka jingïaid lynti kum ka Hima ki ju don beit ki mawjynthut hangne hangtai.”
“Ha ka jingshishaba ki kwah ban pynphriang ïa katei ka khubor ki ladei ban sei ryngkat bad kita ki dulir jingpynshisha ba ïa die jaka lane kum ka Agreement ba ïasoi ïasaiñ hapdeng jong ngi ka Hima bad kita ki BSF. Hynrei baroh ka dei tang ka jingbishni bad ka jingap thap ban pynjah burom ïa ngi kum ki nongïalam jong ka Hima,” la ong u Sirdar ka shnat Hima Nongwah Mawtamur.
“Kumta na ka liang jong ngi kum ki nongïalam jong ka Hima, ngim kwah ban pynsngew ne ban ïa nia bad ki halor katei ka kam, ai ba ma ki kin pynphriang katba ki sngevvbit, namar ba lehse ka dei ka kamai jakpoh long ki. Bad ngi ruh kum ka Hima ngin ym pynsngew, ngin trei beit la ka jong ka kam ha kaba ïadei bad ka kam Hima,” la ong u kyrwoh bad bynrap, “hynrei ngi shu kwah ban ong tang kumne, ba ïoh lehse, ïoh shu don pat mano mano ki bym sngewhun bad kiba kwah tip ïa ka jingshisha ha kaba ïadei bad katei ka jingong ba ngi die jaka sha kita ki BSF, ngi buh ka jingkyrpad ïa kiba kwah ban tip ïa ka jingshisha, ba kin wad ïa kita ki kot ki sla jingpynshisha lyngba ka Right to Information Act (RTI) na ka ophis treikam jong ngi ka Shnat Hima bad ka Ophis BSF bad kumjuh na ka ophis u Deputy Commissioner Ri Bhoi District lane na ka Khasi Hills Autonomous District Council (KHADC).”
“Na ka liang jong ngi ka Hima, ngi pyntip ba ngi ladep phah da ka jingthoh sha ka Khasi Hills Autonomous District Council (KHADC) ha ka 24 tarik, Jymmang, 2019, ban pyrshah jur halor ka jingthmu jong ki katto kame ngut ban die tuh ïa ka jaka jong ka Hima sha ki BSF bad kumjuh ruh ngi la ujor mukotduma pyrshah ïa kitei ki briew ha iingbishar Kashari. Ngi la ïoh ruh ïa ka Stay Order ha ka 4 tarik, Nailur, 2019 bad kane ka Case ka dang sah mynta hapoh ka iingbishar Bishar jong ka District Council Court,” la bynrap shuh shuh u Bah Jana.
