Shillong, Naitung 29: U Myntri ka sorkar jylla bad u nongïalam ka BJP u Bah AL Hek u la thoh sha u Myntri Rangbah ka jylla Chhattisgarh u Vishnu Deo Sai, ha kaba u la kyrpad ban pynlait noh mardor ïa arngut ki sister ka Balang Katholik na Kerala kiba la shah kem ha ka 25 tarik mynta u bnai ha Durg Railway Station.
Kane ka jingshah kem ka long halor ka nongrim ka jingujor First Information Report (FIR) ba la ujor da ka Bajrang Dal, kaba la kynnoh ba ka don ka jingkhaïi met bad ka jingpynbor ban pynkylla niam.
Ha ka shithi jong u, u Bah AL Hek u la pynpaw ka jingsngewkhia halor kane ka jingshah kem bad u la kyrpad ïa u Sai ban shim ki sienjam ba kongsan ban pynlong ka jingtohkit halor kane ka kam.
“Katkum ka jingïakren lyngba ka phone kaba nga la ïasyllok bad phi haba ïadei bad ka jingshah kem ba dangshen jong ki arngut ki sister, nga kwah ban kyrpad ïa phi bad ïa ka ophis jong phi ban sngewbha ban pyllait noh mardor ïa kine ki arngut ki sister kiba la shah kem na Durg Railway Station ha ka 25 tarik u Naitung, 2025 halor ka nongrim ka jingujor ejahar ba la ujor da ka seng Bajrang Dal,” thoh u Bah Hek.
“Da ka jingsngewkhia kaba jur nga kyrpad rit ïa phi bad ïa ka ophis jong phi ban pyllait noh mardor ïa kine ki sister bad ban shim ïa ki sienjam ban pynlong ka jingtohkit halor ki daw kiba mih na kane ka jingjia bad katkum ka jingtip jong nga, nga ngeit ba ka Balang kam shym la leh ïa kano kano ka kam pynkylla niam jubor hynrei ka ai ka jingshakri kaba bha tam sha baroh ki bynriew bad ngan da sngewnguh shibun ïa ka jingpynthikna jong phi ban pyllait noh ïa ki khamkloi,” bynrap u Bah Hek.
Haba kylli, u Bah Hek u la pynthikna ba u Myntri Rangbah u Vishnu Deo Sai u la pynthikna ban shim baroh ki sienjam ban ïoh pyllait noh mardor ïa kine ki sister.
“U Myntri Rangbah u la pynpaw ka jingkmen kaba khraw bad u la ïathuh ïa nga ba un shim baroh ki sienjam ban ïoh pyllait noh mardor ïa kine ki arngut ki sister. Kane kadei ka jingpynthikna ba la pynpaw da u Myntri Rangbah. Mynta ka sngi, nga la phah ïa kane ka shithi kumba la ïasyllok bad u na ka bynta ban pynlait noh mardor ïa kine ki arngut ki sister,” u la bynrap.
Kane ka jingshah kem ka la wanrah ka thma ktien ha ka saiñ hima sima ha kaba ki seng ka liang pyrshah ki la pynrem jur ïa ka sorkar BJP ha jylla Chhattisgarh. Ka seng Congress bad ki nongïalam ka CPI (M) ki la dawa ba dei ban pynlait noh mardor ïa kine ki sister, ha kaba ki la kynnoh ba jur ki jingshah pynshitom beaiñ ki rit paid hapoh ka jingsynshar ka sorkar BJP. U Rahul Gandhi bad Priyanka Gandhi ki la kren ruh pyrshah halor kane ka jingshah kem, da kaba khot ba kane ka dei ka jingthombor ïa ka jinglait luid mane blei.
