Shillong, Jymmang 26: U Deputy Commissioner jong ka East Khasi Hills District u SC Sadhu u la khot da ka jingïalang ha ka Lah Sngi u Blei ban ïasyllok ha kaba iadei bad ki briew kiba sah beaiñ ha jaka jong ka Cantonment kaba don hajan ka Fire and Emergency Service Station ha Lum Survey, Shillong.
Ha kane ka jingïalang la khot lang ia u Superintendent of Police (SP), Chief Executive Officer ka Shillong Cantonment Board, na ka Defence Estate Officer, Guwahati, ia u Secretary ka Meghalaya Urban Development Authority, ia u Chief Executive Officer ka Shillong Municipal Board bad ia ki nongialam ka Hynñiewtrep Youth Council (HYC).
Ha ka sngi saitjaiñ, ka Meghalaya Human Rights Commission (MHRC) ka la bthah ia u Chief Secretary jong ka Sorkar Meghalaya ban ai ia ka kaiphod kaba bniah halor ka jingshah pynpra ki ing tap shilliang jong ki briew kiba sah beaiñ ha Lum Survey.
Ka MHRC ka la bthah ia u Chief Secretary ban phah ia ka kaiphod babniah ha lane shwa ka 30 tarik mynta u bnai. Kum ban shu pynkynmaw hangne, ha ka 23 tarik mynta u bnai, ki nongïalam jong ka Hynñiewtrep Youth Council (HYC) ki la shah pynngat ha ki kyndon aiñ ha ki bor Pulit tang hapoh khyndiat kynta ba ki la leit ban pynpra ïa ki ïing jong ki briew kiba sah beaiñ ha Lum Survey.
Ki Pulit ki la register case ha Sadar Police Station pyrshah ïa u President ka HYC u Bah Roy Kupar Synrem, u Vice President Bah Donbok Kharlyngdoh, u Assistant General Secretary Isaac Basaïawmoit bad kiwei pat ki nongialam bad ki dkhot kiba ym lah ban tip kyrteng.
Ka jingtohkit halor kane ka kam ka dang ïaid shakhmat.
