Shillong, Risaw, 11: Ka Synjuk ki Seng Samla Shnong (SSSS) ka la pynpaw ïa ka jingsngewsih kaba khraw halor ki jingshah thombor bad ka jingshah pynïap jong ki khynnah rit kiba la jia ha kine ki sngi.
“Ngi pynpaw ïa ka jingsngewsih kaba khraw hadien ba ngi la ïohi ïa kiei kiei kiba la jia sawdong jong ka Ri Khasi baieit jong ngi ha kine ki khyndiat snem kiba la wan lyngshop ïa ki khun samla bad mynta ïa ka jingthombor ïa ki heprit kiba luilui,” ong u kyrwoh ba la phah da u General Secretary ka SSSS Central Body u samla Banpyndapbiang Nongsiej.
“Ka Synjuk ka pynrem jur ïa kine ki riewthrang snam kiba la nud ban leh ïa kine ki ki kam pohjait kiba ktah mationg ïa ka Ri baieit eh jong ngi bad lyngba kane ka kyrwoh ngi phah ïa ka khubor sngewlem ïa ka ïing ka sem jong i heprit Kyrshanbor Kharmudai na ka shnong Nongrah, Shillong bad i heprit kynthei ha kawei ka shnong ha Ri Bhoi District,” la ong ka seng.
“To U Blei Trai Kynrad un pyntngen ïa ka ïing ka sem jong kine ki heprit bad to ka mynsiem jong ki kan leit sha la U Trai Nongbuh Nongthaw,” la pynpaw ka Synjuk.
“Ngi kyrpad ruh ïa ki Seng Samla Shnong ha la ki jong ki shnong ba ngin peitngor ïa la ka shnong ka thaw ha kine ki sngi bad ngi kyrpad ïa ka Sorkar lyngba ka tnad Pulit ba kin shim khia ïa kane ka kam shah pynïap klep jong ki heprit bad kiwei ruh kiba la ju jia na ka por sha ka por ha kane ka Ri baieit jong ngi,” la bynrap u kyrwoh.
