Shillong, Rymphang 21: Ka tnat District Council Affairs (DCA) ha ka sngi Thohdieng ka la hukum ban pynlong biang ïa ka jingthep vote ha ki saw tylli ki Constituency ha East Jaiñtia Hills District hadien ba ki briew ki bym lah ban ithuh durkhmat ki la rung jubor bad pynjulor ïa ki Electronic Voting Machines (EVM).
Ïa ka jingthep vote yn sa pynlong biang lashai ka sngi Saitjaiñ naduh ka por 7 baje mynstep haduh ka por 4:00 baje janmiet hapdeng ka jingpynkhlaiñ ïa ki bor pahara.
La ïoh jingkheiñ ba ka jingpoi jong ki nongthep vote ha Khasi Hills Autonomous District Council (KHADC) ka long 60 percent bad ha Jaiñtia Hills Autonomous District Council (JHADC) ka long 70 percent tad haduh ka por 3 baje nohphai sngi.
Haba pyntip ïa kane ka rai jong ka DCA, u Commissioner & Secretary uba khmih ïa ka tnat DCA u Bah Cyril V.Diengdoh u la ong, “ka DCA ka la hukum ban pynlong biang ïa ka jingthep vote ha ki saw tylli ki Polling Station ha ki ar tylli ki Constituency jong ka JHADC ha East Jaiñtia Hills District. Ka jingthep vote kan sdang naduh ka por 7:00 baje mynstep haduh ka por 4:00 baje janmiet.”
Ki polling station, kiba ha ban pynlong ïa ka jingthep vote ki long ha Wapung Skur-A bad ha Wapung Skur-B kiba hap hapoh ka Musniang-Rangad Constituency, ha Bataw A bad ha Bataw B kiba hap hapoh ka Bataw-Lakadong Constituency. Kine ki saw tylli ki polling station la ithuh kum ki Polling Station ki bym shngaiñ bad kiba lah ban mih jingkulmar.
U Bah Diengdoh u la ong ba ka jingshim rai ka long hadien ba la ïoh pdiang ïa ka kaiphod ba ki don ki briew ki bym lah satia ban ithuh durkhmat ki la rung jubor ha kine ki saw tylli ki polling station bad ki la pynjulor ïa ki EVM.
Katkum ka jingong jong u, ïa ka daw tynrai halor ka jingshah pynjulor ki EVM bad ka jingrung jubor jong ki briew bym lah ithuh hapoh ki polling station yn dang pynlong shwa ïa ka jingtohkit bad yn dang ap ïa ka kaiphod.
“Ïa mynta namarba ki EVM ki la julor, ka rul ka shah ïa ngi ban pynlong biang ïa ka jingthep vote katkum ka Rule 143 B. Lada ka don ka jingjia bad ka jingjulor ki EVM, ngi hap ban pynlong biang ïa ka jingthep vote na ka bynta ka jingïaid beit ka jingpynlong ïa ka elekshon bad ka jingthep vote kan long biang lashai ka sngi,” u la ong.
Haba kylli, u Bah Diengdoh u la ong, “ki bor Pulit ki don hynrei ki briew ki wan da ka kynhun bad ki thombor bad ïa ki nongtrei kiba pynïaid ïa ka jingthep vote la pynkynriah noh marmar sha jaka ai jingsumar namarba ki la don hapdeng ka jingsheptieng. Hynrei na ka liang jong ki bor synshar district ki la shimkhia bha bad kam shym la don kano kano ka jingmynsaw ïano ïano ruh ha kane ka jingjia. Baroh ki briew jong ngi kim shym la leilei hynrei lait noh tang ki EVM kiba la shah pynjulor.”
Shuh shuh, ki ophisar ka DCA ki la pyntip ba u Deputy Commissioner bad u Superintendent of Police ka East Jaiñtia Hills ki la shong jingïalang kyrkieh ban pynkhreh na ka bynta ban pynlong biang ïa ka jingthep vote ha ki saw tylli ki Polling Station.
“Lashai ka sngi yn sa pynbun ïa ki Pulit kiba pahara ryngkat ka jingdonlang jong ki Majistor. U DC u la shim ïa ki lad ki lynti ban pynthikna ba ki bor Pulit kin biang nadong shadong bad yn sa phah ruh da kiwei pat ki nongtrei ki ban pynïaid ïa ka jingthep vote sha kine ki Polling Station. Na ka tnat DCA ngi kyrpad ïa ki paidbah ba kim dei ban sheptieng bad ngi pyntip ruh ba kan don biang ka jingthep vote bad ngi kyrmen ba baroh ki nongthep vote kin mih ryntih,” u la ong.
Lada ladep register ïa ka ejahar, u Bah Diengdoh u la ong ba u DC un sa shim ïa kiwei pat ki sienjam.
“Ha baroh ki District jong ka KHADC, kam shym la don satia kano kano ka jingjia. Ka jingthep vote ka la long kaba ïaid beit ha baroh ki district,” u la bynrap.
