Shillong, Nailur, 15: Ki shipai Border Security Force (BSF) ki la ailad biang ïa ki Khasi trai ri trai muluk ban shong die jingdie hajan ka Land Port Authority of India (LPAI) Dawki hadien ba la kyndang ïa ki na kane kad khaii kaba ki ju shong die madan manla ka sngi baroh shikatta.
Dang shen ha ka 12 tarik mynta u bnai, ki bor ba dei peit jong ka Land Port Authority of India (LAPI) ki la bthah ïa ki shipai BSF ban kyndang da ka bor ïa ki Khasi kiba ju shong die jingdie hajan ka LPAI..
Katkum ki video kiba la saphriang ba la ïoh da u Mawphor dang shen, la ïohi ba ka la mih ka jingïania kaba jur hapdeng ki nongdie jingdie bad ki shipai BSF hadien ba la beh noh bad phah pynkynriah ïa ki kali jong ki nongdie jingdie.
Ha ka jingshisha ki Khasi ki shong die jingdie harud ka surok Dawki-Muktapur kaba dei ka surok jong ka tnat PWD (Roads) kaba jngai na ka khyrdop jong ka LPAI haduh kumba 300 mitar eiei.
La ïoh jingtip ruh ba ki shipai BSF ki la kit lut ïa ki tum ki tam bad ïa ki mar jong ki nongdie jingdie sha ka ktem.
Ka khubor ba la ïohlum ka ïathuh ba ka jingailad jong ki bor ba dei peit jong ka Land Port Authority of India (LPAI) ïa ki Khasi ban shong die jingdie biang ka dei lyngba ka jingtuklar jong u Bah L.S Khonglah uba dei u muktiar hynnin ka sngi Saitjaiñ.
Ka jingailad ïa ki Khasi ban shong die jingdie ka dei kaba la ai jingbit tang shi por tad haduh ba ki bor Land Port Authority of India (LPAI) kin da shim da kawei pat ka rai kaba khatduh. Ka jingailad biang ban shong die jingdie ka dei hadien ka jingïakren bad ki bor shipai BSF.
